«Qorǵas-Shyǵys qaqpasy» AEA-daǵy halyqaralyq júk jáne jolaýshylar áýejaıynyń jobasy ICAO halyqaralyq usynymdaryna sáıkes avıasııalyq ınfraqurylym salýdyń úsh kezeńdi baǵdarlamasyn kózdeıdi. Birinshi kezeń sheńberinde 2027 jylǵa deıin ótkizý múmkindigi saǵatyna 50 adamǵa deıin jolaýshylar termınaly (2032 jylǵa qaraı – saǵatyna 500 adamǵa deıin) salynbaq. Onda JET A-1 avıaotyny jańa túriniń zamanaýı otyn qoımasynyń kólemi jylyna 200 myń tonnaǵa deıin (2032 jylǵa qaraı – 550 myń tonnaǵa deıin) ulǵaıady. Jańa áýejaıdyń avtoturaǵyna qosa jylyna 50 myń tonna temirjol tuıyǵy bar júk termınalyn (2032 jylǵa qaraı – jylyna 250 myń tonnaǵa deıin) salý josparlanyp otyr.
Ekinshi jáne úshinshi kezeńder sheńberinde 2032 jylǵa deıin týrıstik jáne oıyn-saýyq ınfraqurylymy qolǵa alynbaq. Investısııalardyń jalpy kólemi – shamamen 250 mlrd teńge. Sondaı-aq jobada «Air–Rail–Auto-Air» júk tasymaldarynyń mýltımodaldy syzbasyn ázirleý, Azııa-Tynyq muhıty aımaǵy baǵytyndaǵy kólik pen logıstıkalyq marshrýttardyń túıisken jerinde ekonomıkalyq ósýdiń jańa múmkindikterin ashý kózdelgen.
«Memleket basshysy Qasym-Jomart Toqaev Qazaqstan ekonomıkasy qurylymyn ártaraptandyrý jónindegi aýqymdy jumys sheńberinde kólik-logıstıka salasyn basym baǵyttardyń biri retinde atady. Jetisý oblysynda zamanaýı áýejaı salý jobasyn júzege asyrý ınfraqurylymdy damytýǵa eleýli serpin beredi. Sonymen qatar Qazaqstannyń Qytaı, Ortalyq Azııa jáne Eýropa arasyndaǵy tranzıttik hab retindegi rólin nyǵaıtady», dedi O.Bektenov.
«Skyhansa» kompanııasynyń teń quryltaıshysy, dırektorlar keńesiniń múshesi, doktor Krıstın Grıotsbah jobanyń avıasııalyq ınfraqurylymdy damytýmen qatar óńirde zamanaýı logıstıkalyq jáne iskerlik ortalyq qalyptastyrýdyń mańyzdylyǵyna toqtaldy. «Biz jaı ǵana áýejaı emes, halyqaralyq deńgeıdegi damyǵan ınfraqurylymy, onyń ishinde júk jáne jolaýshylar termınaldary, janarmaı quıý kesheni, áýe kemelerine avıasııalyq-tehnıkalyq qyzmet kórsetý ortalyǵy (MRO), bıznes ortalyǵy, mýltımodaldy logıstıkalyq múmkindikterge arnalǵan qonaqúıleri bar kópfýnksıonaldy óńirlik hab quryp jatyrmyz. Onyń Qytaımen shekaraǵa jaqyn ornalasýy «Qorǵas – Shyǵys qaqpasy» AEA sheńberinde halyqaralyq saýdany damytýǵa múmkindik beredi. Al onyń temirjol men avtojol jelilerine qosylýy jańa Jibek jolyndaǵy keleshegi zor logıstıkalyq toraptardyń birine aınaldyrady», dep atap ótti doktor Krıstın Grıotsbah.
Kezdesý sońynda Kólik mınıstrligi men «Skyhansa» arasynda Investısııalar týraly kelisimge qol qoıyldy. Qujatqa sáıkes, ınvestor qajetti avıasııalyq ınfraqurylym qurylysyna negizinen otandyq materıaldar men qyzmetterdi paıdalanylady. Sondaı-aq jobany júzege asyrýǵa qyzmetkerlerdiń keminde 90%-y Qazaqstan azamattary bolady. Bul jańa jumys oryndarynyń ashylýyna serpin bermek. Igi isti júzege asyrýda bizdiń tarap ınjenerlik jáne kólik ınfraqurylymyn tartyp, arnaıy ekonomıkalyq aımaqqa qatysýshylarǵa maqsatty jeńildikter qarastyrmaq.
Joba «Skyhansa» birlesken qazaqstandyq-germandyq kásipornynyń qatysýymen júzege asyrylyp jatyr. Germanııa tarapynan seriktes retinde avıasııalyq termınaldar men ınfraqurylymdy damytý boıynsha joǵary qyzmet kórsetetin «The Hansa Consortium» kompanııasy, Qazaqstan tarapynan – Qazaqstan, Ortalyq Azııa jáne Kavkaz naryǵyndaǵy áýejaılar úshin keshendi qyzmetter men ınjınırıngtik sheshimder usynatyn «Skymax Technologies» kompanııalar toby jumyldyrylady.
