Foto: Úkimettiń baspasóz qyzmeti
«Jalpy ekonomıkalyq jaǵdaı turaqty. Alaıda jyldar boıy qordalanǵan máseleler de joq emes. Úkimet olardy sheshý úshin júıeli jumys atqaryp jatyr», dedi Úkimet basshysy depýtat Erlan Saırovtyń saýalyna jaýap bere otyryp.
Bektenov atap ótkendeı, qazirgi tańda elimizde salyq reformasy júrgizilip jatyr. Jańa qabyldanǵan Salyq kodeksi kelesi jyldan bastap respýblıkalyq bıýdjetke shamamen 3 trln teńgeden astam qosymsha túsim ákeledi dep kútiledi.
«Bul qarjynyń barlyǵy tek damý maqsattaryna – ınfraqurylym, elektr qýaty, kólik jelileri men ınjenerlik ınfraqurylymdy jańǵyrtýǵa baǵyttalady. Bul – uzaq merzimdi ári turaqty ekonomıkalyq ósimniń negizi», dedi Oljas Bektenov.
Premer-mınıstrdiń aıtýynsha, úkimet júrgizip jatqan sharalardyń nátıjesinde salyq bazasy keńeıip, respýblıkalyq bıýdjetke qosymsha túsimder túsedi. Bul memleketke áleýmettik jáne ekonomıkalyq mindettemelerdi tolyq oryndaýǵa múmkindik beredi.
Sonymen qatar, Bektenov 2026–2028 jyldarǵa arnalǵan respýblıkalyq bıýdjet jobasyn ázirleý barysynda bıýdjet tapshylyǵyn tómendetý boıynsha naqty mejeler qoıylǵanyn aıtty:
- 2026 jyly – tapshylyq IJО́-niń 2,5%-yna deıin;
- 2027 jyly – 1,8%-ǵa deıin;
- 2028 jyly – 1,4%-ǵa deıin qysqarmaq.
«Bıýdjet tártibin kúsheıtip, tabys kózderin ulǵaıtý arqyly biz aldaǵy úsh jylda bıýdjet tapshylyǵyn eki esege jýyq tómendetýdi josparlap otyrmyz», dep túıindedi sózin Úkimet basshysy.
