«2023 jyly Prezıdenttiń saılaýaldy baǵdarlamasyn iske asyrý aıasynda Eńbek jáne halyqty áleýmettik qorǵaý mınıstrligi jas kásipkerlerge jyldyq 2,5% mólsherlememen mıkrokredıt berý quralyn engizdi. «Agrarlyq nesıe korporasııasy» AQ-nyń kelisimimen kepilge qabyldanatyn nysandar tizbesi keńeıtildi», dep jaýap berdi Oljas Bektenov depýtattyq saýalǵa.
Premer-mınıstrdiń málimetinshe, tizimge mynalar kiredi:
-
ekinshi deńgeıli bankterdegi shottardaǵy aqsha qarajattary;
-
respýblıkalyq jáne oblystyq mańyzy bar qalalarda, aýdan ortalyqtarynda, vedomstvolyq baǵynysty qalalar men aýyldyq eldi mekenderdegi jyljymaıtyn múlik;
-
jekemenshikke nemese uzaq merzimdi jalǵa alynǵan aýyl sharýashylyǵy maqsatyndaǵy jer telimderi (egistik jerler);
-
jaıylymdardy sýarýǵa arnalǵan ınfraqurylymy bar jáne qorshalǵan jer telimderi;
-
baý-baqsha úshin bólingen jerler;
-
arnaıy tehnıka.
«2023 jyly jalpy somasy 26,4 mlrd teńgege 5 658 mıkrokredıt berildi. Onyń 64,6%-y (3 656 mıkrokredıt) aýyldyq jerlerde, 35,4%-y (2 002 mıkrokredıt) qalalarda berildi. Eń kóp úles mal sharýashylyǵyna tıesili — 54,8%, odan keıin qyzmet kórsetý salasy (32,9%), saýda (6,9%), jeńil ónerkásip (3,8%), eginshilik (1,1%), qaıta óńdeý salasy (0,5%)», dep atap ótti O. Bektenov.
Sondaı-aq ol 2024 jyly respýblıkalyq bıýdjet tapshylyǵyna baılanysty mıkrokredıtteýdi qarjylandyrý qarastyrylmaǵanyn aıtty.
«Degenmen, jastar kásipkerligin qoldaý 2022 jyldan beri iske asyrylyp kele jatqan «Aýyl amanaty» jobasy aıasynda jalǵasady. Bul jobada da aýyldyq jerlerdegi jyljymaıtyn múlik kepil retinde qabyldanady», dep qosty Úkimet basshysy.
