Jınalǵan qaýym Tımýr Dosymbetov, Edýard Aırıh jáne Qazybek Baıbolov syndy serkelerge arnalǵan estelik taqtalar ornatylǵanyna óz rızashylyqtaryn bildirdi. Rasynda da, esimderi atalǵan azamattardyń Qazaq eli sportyna sińirgen eńbekteri orasan zor. Máselen, bessaıysshy Tımýr Dosymbetov 1982 jyly Rımde ótken álem chempıonatynda bas júldeni oljalady. Sol komandanyń sapynda qandasymyzdan bólek, dýshanbelik Anatolıı Starostın men krasnodarlyq Evgenıı Lıpeev te óner kórsetti. Sol kezde KSRO quramasy ózderiniń basty qarsylastary – Majarstan men Italııany artqa tastaǵan edi. Úlken sporttan qol úzgennen keıin Tımýr Kamaluly qazirgi bessaıystan Qazaqstan quramasynyń aǵa jattyqtyrýshysy bolsa, 1990 jyly jańadan qurlyǵan UOQ-tyń tuńǵysh prezıdenti bolyp saılandy.
1964 jyly Reseıden Qazaqstanǵa qonys aýdarǵan Edýard Aırıh kelgen bette dopty hokkeıden jerigilikti «Dınamonyń» tizginin ustady. Maıtalman mamannyń jetekshiligimen almatylyqtar KSRO chempıony atanyp, kúmis pen qola medaldi tórt retten ıelendi. 1978 jyly Aırıhtyń komandasy Eýropa chempıondary kýbogin oljalady. Sonymen qatar, ol kógaldaǵy hokkeıdi de damytýǵa aıryqsha úlkes qosty. Edýard Ferdınanduly baptaǵan ujym 1969-1988 jyldar aralyǵynda Keńes odaǵy birinshiliginiń 14 dúrkin jeńimpazy jáne tórt dúrkin kúmis júldegeri atandy. Al KSRO quramasy Máskeý Olımpıadasynda qola, Eýropa chempıonatynda kúmis jáne Qurlyqaralyq kýbokte bas júldeni oljalady. Sosıalıstik memleketterdiń basyn qosqan «Dostyq» oıyndarynda bes ret top jardy.
Qazybek Baıbolovtyń da esimi jankúıerlerge jaqsy tanys. Jas shyǵynda ol Almatynyń «Dınamosynda» oınap, KSRO chempıonatynda toǵyz ret jeńis tuǵyryna kóterildi. Sol júldelerdiń tórteýi – kúmis jáne beseýi – qola. Bapker retinde baǵyndyrǵan belesteri odan da zor. Edýard Aırıhpen ıyq tiresip eńbek etken Qazybek Dáýletbekuly dopty jáne kógaldaǵy hokkeıshilerimizdiń joǵaryda atalǵan jetistikterge jetýine súbeli úles qosty. Aırıh pen Baıbolov tandemi tárıbelegen shákitter osy sport túrlerinde tolaǵaı tabystarǵa qol jetkizdi.
