2010 jyldyń jaz mezgili-tin. 10-synypty bitirgen órim kezim. Alqapta qarbyz artyp júrgenimizde, kenet eki aýyldas aǵam shekisip qalyp, «Men sen sekildi áli kúnge dop qýyp júrgen joqpyn» dedi biri. Ekinshisi «Dop qýsam da upaıym túgel, men túbi senen ozamyn!» dedi julyp alǵandaı. «Kel básteseıik, osydan 4 jyldan keıin kimniń ozaryn kóreıik, sonda kórersiń kimniń kim ekenin» dep aqyry ekeýi qol alysty.
Sodan beri, mine, tórt jyl da óte shyqty. Qazir ekeýiniń de jasy jıyrma besten asyp jyǵylǵan. Biraq ekeýiniń de ne ózgergen, ne qoparyp tastaǵan túgi joq. Sol baıaǵy súıkimsiz myjyraıǵan úıler, batpaqqa belshesinen batqan esik aldyndaǵy arba, aqjemtir bolyp ketken shatyrlar... Birde aýylda birin kezdestirip qalyp «Osydan tórt jyl burynǵy básteskeniń esińde me?» dedim, álgi jigitim jarqyraı kúlip, «Qandaı bástesý, sen de júrgen qııalsyń» dedi de qoıdy.
Meniń bilgim kelgeni, adamdar rasynda ózgere ala ma? Nemese taǵdyrmen soqyrteke oınap júrip oqystan súrinip qalyp, babasynyń babasyn qaıtalap «adamdyq qoqysyna» tastala ma? Bala kúnimde bir kisini Qudaı dep oılaıtynmyn. Bir kúni kóshede qulap jatqanyn kórip «Qudaı bolsa nege qulaıdy?» dep uzaq oılanǵanym áli esimde. Shynynda tirshilik bar bolǵany Gıtlershe aıtqanda «О́limge kezekke turý» ǵana bolǵany ma?!
Adamdyq básekesi – máńgilik bitispes maıdan. Bul maıdan jan dúnıemizde toqtaǵan kúni, bizdiń sanaly tirshiligimiz de toqtaıdy.
