Taskesken aýylynda dástúrli «Aýyl – el besigi» mádenı-sporttyq festıvali aıasynda aýylda qoǵamdyq saýyqtyrý kesheni ashyldy. Festıval mesenat Talǵat Saqannyń uıymdastyrýymen, oblys ákimdiginiń qoldaýymen ótti.
Festıvaldiń saltanatty ashylýyna aýdanǵa jumys saparymen barǵan oblysy ákimi Berik Ýálı qatysyp, bul toıdyń aýyl turmysynyń jaqsarýyna septigi tııý kerektigin aıtty.
– Abaı óńirinde Atymtaı jomarttyq pen týǵan jerge qyzmet etý qashanda asyl murat bolyp kelgen. Osy dástúrdiń jarqyn úlgisin kórsetip júrgen azamattar óńirimizde az emes. Solardyń biri – osy jerdiń týmasy, belgili kásipker, týǵan aýyldyń janashyry Talǵat Saqan ekenin erekshe atap ótkim keledi. Taskesken aýylynyń kireberis qaqpasy (arka) ornatyldy. 2024 jyly 2 kóshege asfalt tóseldi. Qoǵamdyq saýyqtyrý ortalyǵyn halyq ıgiligine berildi. 100 orynǵa arnalǵan balabaqsha qurylysy júrip jatyr, – dedi aımaq basshysy.
Búginde Úrjar aýdanynda jeke ınvestorlardyń qarjysymen kóptegen joba iske asyp jatyr. Máselen, qytaılyq tarappen birlesken «Shyń Jan Jýo Ang-Sunkar» JShS kúnbaǵys maıy men un óndiretin jáne mal azyǵyn daıyndaıtyn quny 5,5 mıllıard teńge bolatyn keshen salýdy bastady. Buǵan qosa «Urdjar Agro Trade» JShS qýattylyǵy táýligine 100 tonna bolatyn maıly daqyldardy óńdeıtin zaýyttyń qurylysyn júrgizip jatyr. Investısııa kólemi – 800 mln teńge.
Merekelik baǵdarlamada respýblıkalyq aıtys, 70 shaqyrymdyq alaman báıge, 15 shaqyrymdyq «Taskesken júırigi» at jarysy, qyz qýý, teńge ilý, qoı kóterý, sadaq atý, kıiz úı tigý saıystary da bar. Al «Topjarǵan» etno-mádenı ortalyǵy akrobatıkalyq ónerden sheberligin kórsetip, ult dástúrin dáriptedi.
Abaı oblysy
