Buǵan deıin «Zań men tártip» aptalyǵy aıasynda Ishki ister mınıstrliginiń Basqarý akademııasynyń saltanatty ashylýy ótken bolatyn.
Aýdıtorııa zamanaýı tehnıkalyq quraldarmen jabdyqtalǵan. Munda naqty jaǵdaılarǵa uqsas taktıkalyq ssenarıılerdi qaıta qurýǵa múmkindik beretin júıeler ornatylǵan. Kúndelikti qyzmette qoldanylatyn avtomattandyrylǵan basqarý júıesi de engizilgen.
«Mundaı aýdıtorııanyń ashylýy – bolashaq ofıserlerdi daıarlaýdaǵy mańyzdy qadam. Bul – tájirıbege negizdelgen oqytý tásilin júzege asyryp, komandırlik qabiletti jetildirýge baǵyttalǵan alań. Árbir avtomattandyrylǵan jumys orny taktıkalyq is-qımyldardy modeldeýge arnalǵan jáne áskerı bólimderdi basqarýǵa qajetti aqparattyq resýrstarǵa qol jetkizýdi qamtamasyz etedi. Bul óz kezeginde jattyǵý kezinde taktıkalyq tapsyrmalardy tıimdi pysyqtaýǵa jol ashady», dedi general-maıor A.Baltabekov.
Aýdıtorııaǵa engizilgen sıfrlyq sheshimderge biryńǵaı aqparattyq orta kiredi. Ol óńirlerdegi jedel ahýal týraly málimetterdi ortalyqtandyrylǵan túrde qabyldap, óńdeýge múmkindik beredi. Sonymen qatar sheshim qabyldaýdy qoldaý júıesi men geoaqparattyq júıe engizilgen. Bul platformalarda normatıvtik qujattar men jeke quramnyń is-áreketteriniń algorıtmderi qamtylǵan.
Sondaı-aq patrýldik baǵyttar boıynsha áskerı jasaqtardyń qozǵalysyn naqty ýaqyt rejiminde kórsetetin jaýyngerlik kezekshilikti baqylaý jáne monıtorıng júıesi de jumys isteıdi.
Qazirgi tańda Ulttyq ulan elimizdiń 21 qalasynda qoǵamdyq tártipti qamtamasyz etedi. Qoǵamdyq qaýipsizdik pen mańyzdy nysandardy kúzetý isine 7 myńnan astam áskerı qyzmetshi jumyldyrylǵan. Sonymen qatar IIM-ge qarasty 39 qylmystyq atqarý júıesi mekemesin kúzetý de solardyń mindetine kiredi.
Ulttyq ulannyń qyzmeti quqyq qorǵaý organdarymen, atap aıtqanda IIM, UQK, Sybaılas jemqorlyqqa qarsy is-qımyl jáne Qarjylyq monıtorıng agenttikterimen birlesken arnaıy operasııalarǵa qatysýdy da qamtıdy.
