Sýretterdi túsirgen – Esenjol Isabek
Pavlodardyń Ortalyq jaǵalaýynda otandyq feshn-ındýstrııadaǵy mega rekord tirkeldi. Dástúrli etnomádenıettegi qazaq áıelderiniń kıimi – «Alyp kımeshek» tanystyryldy. Is-sharaǵa aq kımeshek kıgen 200-ge jýyq ana qatysyp, ulttyq bas kıimdi dáriptedi.
– Qazaq halqynyń dástúrli mádenıetindegi bul bas kıimdi tek turmystaǵy áıelder kıgen. Kımeshek áıelderdiń otbasyndaǵy jáne qoǵamdaǵy erekshe mártebesiniń kórsetkishi ispetti. Joba avtory – belgili dızaıner-sheber Gúlaıym Akýmbaeva, ol jumysyna jergilikti folklordy negiz etip alǵan. Is-sharany qalalyq ákimdiktiń qoldaýymen «Qazaq analary – dástúrge jol» RQB uıymdastyryp otyr, – dep habarlady Pavlodar qalalyq ákimdiginen.
«Alyp kımeshek» jobasynyń ıdeıasy maǵan byltyr keldi. Bizdiń qazaqtyń kımeshegin nege halyqaralyq deńgeıge shyǵarmasqa dedim. Ondaǵy maqsatym – osy ulttyq kıimimizdi álemge áıgili etý. Ony tikkende uzyndyǵy sýaǵarymen birge 4 metrdi ıgerdi. Al aldyńǵy bóligi 2,35 metr boldy. Negizinen «Qazaqtardyń ulttyq kıimi» degen ǵylymı katalog bar. Sol katalogtiń 99-betinde 1950 jyly tigilgen kımeshektiń úlgisi boıynsha jasadym. Úlgini 2,5-3 esege úlkeıtkende osy ólshemder shyqty», deıdi Gúlaıym Akýmbaeva.
Alyp kımeshekti Global Book of Records/GbR ókilderi resmı túrde tirkep, Global Book of Records/GbR jańa halyqaralyq rekordtar kitabyna engizdi.
Mega bas kıimniń jalpy bıiktigi 3 metr 80 sm, kúmis jáne metall tıyndarmen áshekeılengen, injý men basqa da asyl tastardy qosa alǵanda 2025 dana monshaq qoldanylǵan.
PAVLODAR
