Memleket basshysy Qasym-Jomart Toqaev respýblıkalyq pedagogter sezinde aýyl mektepterin zııatkerlik, sondaı-aq qoǵamdyq ortalyq retinde damytý mańyzdy ekenin atap ótken bolatyn. Sol sebepti, joba sertıfıkatyn ıemdengen pedagogtiń moınynda aýyl mektebiniń bilim sapasyn arttyrý júgi bar.
Dýman Sádirıslam «Bilim berýdegi ózgeristerdiń 1000 kóshbasshysy» kadrlyq rezervi jobasynyń irikteý kezeńinde Ulytaý oblysynyń atynan baǵyn synapty. Bul joba Memleket basshysynyń tapsyrmasymen Oqý-aǵartý mınıstrligi Prezıdenttik jastar kadrlyq rezerviniń úlgisinde bilim salasyndaǵy ózgeristerdiń kóshbasshylaryn irikteý jáne daıarlaý tetigin ázirleý jáne bekitý boıynsha jumys júrgizip otyr.
Dýman Ǵanıuly jobanyń irikteý kezeńinen súrinbeı ótip, oqýǵa qabyldanady. Jobanyń alty kezeńinen, bes emtıhanynan múdirmeı ótken ol bilim salasyndaǵy kadr rezervi qataryna enedi. Byltyr saltanatty túrde Oqý-aǵartý mınıstri Ǵanı Beısembaevtyń qolynan sertıfıkat alǵan.
Jobanyń ereksheligi sonda, kadr rezervine qabyldanǵan pedagog konkýrssyz mekteptegi basshylyq laýazymyna birden taǵaıyndalady. Dýman Ǵanıulyna kadr rezerviniń qatysýshysy retinde Ulytaý oblysy, Aqmola oblysy, Qaraǵandy oblysynyń bilim basqarmalarynan usynys túsipti.
Sóıtip, sáýir aıynda Qaraǵandyny tańdaǵan úmitker oblystyq bilim basqarmasynyń basshysy Gúlbaqyt Júnisovanyń kelisimimen, Qarqaraly aýdandyq bilim bóliminiń basshysy Abylaı Jalelovtiń qoldaýymen Qaraǵaıly kentiniń №16 mektebine dırektor bolyp taǵaıyndaldy.
Úr jańa dırektor Dýman Ǵanıulynyń ómir joly túrli óńirmen órilgen. Qyzylorda oblysy Jańaqorǵan aýdany Keńes aýylynda dúnıege kelip, Jezqazǵan qalasyndaǵy №1 jalpy bilim beretin mektepte oqýdy úzdik támamdaıdy. Astana qalasyndaǵy A.Qusaıynov atyndaǵy Eýrazııa gýmanıtarlyq ınstıtýtynda «qazaq tili men ádebıeti» mamandyǵyna oqýǵa túsedi. 2016 jyly oqýyn sátti aıaqtap, dıplomyn qolyna alǵan soń, Jezqazǵan qalasyndaǵy qara shańyraq №8 gımnazııasyna aǵa tálimger bolyp jumysqa qabyldanǵan. Sodan keıin qazaq tili men ádebıeti páni muǵalimi qyzmetine aýysyp, balalarǵa sabaq beredi. Jas mamandardyń respýblıkalyq, oblystyq, qalalyq baıqaýlaryna qatysyp, júldeli oryndarǵa ıe bolady. «Úzdik til mamany», «Úzdik uıym», «Qazaqstan ustazy» baıqaýlarynyń jeńimpazy. Muǵalimdik eńbek etken jylynyń qorytyndysynda mekteptegi «Kreatıvti ustaz» atalymyn jeńip alǵan. Onymen qosa, oqýshylary respýblıkalyq Muqaǵalı oqýlary, Abaı oqýlary, Ábish oqýlary, Maǵjan oqýlary sııaqty túrli baıqaýda top jarǵan.
«О́rleý» biliktilikti arttyrý ortalyǵy uıymdastyrǵan respýblıkalyq «Pedagogıkalyq ıdeıalar panoramasy» konkýrsynyń Oqý saýattylyǵy atalymynda I oryn, «Pedagogıkalyq ıdeıalar festıvali» konkýrsynyń qalalyq, oblystyq kezeńderiniń júldegeri. Mekteptegi telestýdııa kabınetiniń jetekshisi retinde oqýshylardy jýrnalıstıka mamandyǵyna baýlyǵan. Osyndaı jetistikteri bar Dýmannan osal basshy shyǵa qoımas.
«Jobada alǵan bilimimdi aýyldyq jerde shyńdap, tájirıbe jınaǵanym durys shyǵar degen sheshimge keldim. Qaraǵandy oblysy bilim basqarmasynyń kadr bólimi mamany Jannat Amangeldiqyzynyń kómegimen Qarqaraly aýdany Qaraǵaıly kentin tańdadym. Qaladan aýylǵa kóship kelgendegi alǵashqy áserimdi sózben jetkize almaımyn. Qarqaralynyń kózdiń jaýyn alatyn tabıǵaty, aspanmen talasqan taýlary jazyqta týyp-ósken maǵan unady. Aýyl turǵyndarynyń, mektep ujymynyń qushaq jaıa qarsy alýy júrekke jylý syılady. Aýyl ákimi Muratbek Zekenuly ujymmen tanystyryp, aýyldyń tynys-tirshiliginen habar berip, qoldan keler kómegin aıamaıtynyn aıtty. Aýyl jurtynyń daladaı darqan kóńili bar kúsh-jigerimdi aıanbaı qyzmet etýge serpin beredi», deıdi Dýman Ǵanıuly.
Jary Jansaıa Qaıyrjanqyzymen joǵary oqý ornynda tanysqan. Ol da – qazaq tili men ádebıeti pániniń muǵalimi. Jary mektep janyndaǵy «Baldyrǵan» balabaqshasyna qazaq tili mamany bolyp jumysqa ornalasypty. Osylaısha, aýylǵa qonys aýdarǵan muǵalimder otbasy úıiniń qamyna kirisip jatyr.
Qaraǵandy oblysy
