Qazirdiń ózinde onyń qanjyǵasynda sheteldik 4 grant tur. Taǵy 4 ýnıversıtet 70–80 paıyz jeńildikpen oqýdy usynǵan.
Aızere Qosanova oblys ortalyǵyndaǵy №8 lıseıdi aıaqtady. Aıtýynsha, oqý uıasynda birinshi synyptan bastap bilim alǵan. Áýel bastan-aq gýmanıtarlyq jáne shyǵarmashylyq pánder kóńiline unap, ádebıet, tarıh, shet tilderin qyzyǵa oqyǵan. Mektepte belsendiligimen kózge túsip, túrli jobaǵa, áleýmettik bastamalarǵa udaıy ún qosqan.
«9-synypta oqyp júrgende áleýmettik ǵylym men kásipkerlik negizderine den qoıa bastadym. Ol ýaqytta bolashaq mamandyǵym týraly kóp oılamappyn, maǵan taldaý jasaý, kreatıvtilikti qajet etetin, áleýmetke paıdasy zor salalar jaqyndaý kórinetin. Sondyqtan turaqty damý, bıznes jáne halyqaralyq qarym-qatynas taqyryptaryna tereńirek úńile bastadym», deıdi daryndy túlek.
Ol mektepte oqyp júrgende qazaq, orys jáne aǵylshyn tilderi boıynsha olımpıadalarǵa qatysyp, qalalyq jáne oblystyq deńgeıde talaı márte jeńimpaz atandy. О́zi jasaǵan ekologııa jáne bızneske baılanysty ǵylymı jobalaryna erekshe mán beretini baıqalady. Sol ýaqytta Pavlodar oblysyndaǵy qorshaǵan ortanyń jaǵdaıyn taldaý úshin spýtnıktik málimetterge den qoıǵan. Onysy nátıjesiz qalǵan joq.
Osyndaı birneshe jylǵy izdenisteri Aızereni úlgili ári ozat oqýǵa jeteledi. Mektep bitirgen shaqta UBT tapsyryp, nátıjesinde, 122 upaı jınady. Qazirgi ýaqytta oǵan sheteldik 8 ýnıversıtetten usynys jasalyp otyr. Olardyń arasynda halyqaralyq bedelge ıe «New York University Shanghai», «Penn state university», «The university of British Columbia», «The American university of Paris», «Carnegie mellon university», «Drexel university», «HULT university», «Simmons university» sııaqty oqý oryndary bar.
«Men sheteldik oqý oryndarynyń árbiriniń baǵdarlamasyn zerttep shyqtym. Olardaǵy oqý quny ýnıversıtet pen memlekettiń ózine baılanysty eken. Barlyq aqparatty oqý oryndarynyń saıttarynan tabýǵa bolady. Oqý qunynyń negizgi bóligi grant esebinen jabylǵanymen de, báribir tamaqtaný, jol júrý jáne taǵy da basqa qosymsha shyǵyndar bar. Biraq báribir oqý granty árbir otbasy úshin úlken qoldaý. Ata-anam meni óz múmkindikteriniń sheginde qoldaýǵa daıyn. Sondyqtan aldaǵy ýaqytta granttyq jáne stıpendııalyq baǵdarlamalar arqyly oqysam degen oıdamyn», deıdi ol.
Aızere – otbasynynyń ortanshysy. Aǵasy sheteldik ýnıversıtette grantpen bilim alyp jatyr. Al inisi mektepte oqıdy.
Pavlodar oblysy
