Foto: pixabay.com
Jaýapty mınıstrlik – Eńbek jáne halyqty áleýmettik qorǵaý mınıstrligi bul másele boıynsha resmı túsinikteme berdi. Mınıstrlikke qarasty Halyqty áleýmettik qorǵaý salasyndaǵy retteý jáne baqylaý komıtetiniń málimetinshe, elimizdiń zańnamasyna sáıkes, eger zeınetaqy alýshynyń banktik shotynda úsh aı qatarynan eshqandaı operasııa júrgizilmese, ıaǵnı shot qozǵalyssyz qalsa, onda tólemder kelesi aıdyń basynan bastap ýaqytsha toqtatylady.
Mundaı operasııalar qataryna kez kelgen shyǵys qozǵalysy – dúkende karta arqyly tólem jasaý, basqa shotqa aqsha aýdarý nemese qolma-qol sheship alý kiredi. Bul talap zeınetaqy qarajatyn únemdeýge baǵyttalǵan emes, kerisinshe, qarjy ıesiniń qaýipsizdigin qamtamasyz etý úshin qabyldanǵan.
«Keı jaǵdaılarda azamattar shotqa qol jetkizý múmkindiginen aıyrylyp qalýy múmkin. Bul kezde úshinshi tulǵalar aqshaǵa ıe bolyp ketý qaýpi týyndaıdy. Sondyqtan mundaı normalar tólem alýshynyń múddesin qorǵaý maqsatynda engizilgen», delingen mınıstrlik habarlamasynda.
Eger zeınetaqy tólemi toqtatylatyn bolsa, zeınetkerge bul týraly arnaıy eskertý Qazposhta arqyly joldanady. Tólemdi qaıta jalǵastyrý úshin alýshy Halyqqa qyzmet kórsetý ortalyǵyna baryp, tıisti ótinish berýi kerek.
Eske sala keteıik, buǵan deıin Eńbek mınıstrligi bilim berý salasyndaǵy zańsyzdyqtar jóninde de keń kólemdi tekserister júrgizgenin habarlaǵan bolatyn. Osy tekserýlerdiń nátıjesinde sońǵy bes-alty jylda bilim júıesinde 18 mıllıard teńgege jýyq qarajattyń jymqyrylǵany anyqtalǵan edi.
Zeınetaqy máselesi – árbir el azamatynyń alańdaıtyn salasy. Sondyqtan bul baǵyttaǵy túsindirý jumystary barynsha naqty, ashyq ári túsinikti júrgizilýi tıis. Ýaqytsha toqtaý – tólemnen bas tartý emes. Alaıda bank shotyńyzda uzaq ýaqyt boıy esh qozǵalys bolmasa, tólem ýaqytsha kidirtiletini este bolǵany jón.
