Foto: Stepnogorsk qalasynyń ákimdigi
Sharaǵa 150-den astam adam qatysqan. Olardyń arasynda «Jasyl el» eńbek jasaqtarynyń sarbazdary, qalalyq máslıhat depýtattary, memlekettik organ ókilderi, kolledj stýdentteri, qoǵamdyq uıym músheleri men eriktiler, sondaı-aq «Vodokanal» mekemesiniń qyzmetkerleri boldy.
Qatysýshylar «Mahabbat alleıasyn» qoqystan tazartyp, qalanyń ekologııalyq mádenıetine úles qosqan. Turǵyndardyń súıikti demalys orny sanalatyn bul alleıany taza kúıde saqtaý barshaǵa ortaq jaýapkershilik ekeni atap ótildi.
Is-sharaǵa arnaıy kelgen qala ákiminiń orynbasary Janasyl Sabyruly qorshaǵan ortany qorǵaýdaǵy azamattyq belsendiliktiń mańyzyn atap ótti. Ol jastardyń belsendiligin joǵary baǵalap, mundaı bastamalardyń ekologııalyq mádenıetti qalyptastyrýdaǵy rólin erekshe atady.
Aıta keteıik, «Taza Qazaqstan» ekologııalyq aksııasy jyl boıy jalǵasady. Qala aýmaǵynda aldaǵy ýaqytta birneshe senbilik pen tabıǵatty qorǵaýǵa baǵyttalǵan is-sharalar josparlanǵan.
