foto: pricom.kz
Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkasııalar tobynyń málimetine súıensek, sý aıdyndaryndaǵy 46 orynda sýǵa túsýge ruqsat berilgen. Alaıda, jaǵajaılar daıyn bolmaǵandyqtan, 41 orynda shomylý maýsymyn ashý belgisiz merzimge keıinge shegerilip otyr.
«Qazir oblys aýmaǵyndaǵy sý aıdyndarynda 70 qaýipti oryn bar. Soǵan baılanysty qaýipsizdik sharalaryn kúsheıtý maqsatynda tótenshe jaǵdaılar departamentiniń qyzmetkerleri jergilikti atqarýshy organdarmen birge sý aıdyndaryna 266 tyıym salý belgisin, 12 aqparattyq stend ornatyldy. Sý aıdyndaryn shomylýǵa daıyndaý, qaýipsizdik talaptaryna sáıkestigin tekserý jumysy júrgizilip jatyr. Kún saıynǵy reıdtik is-sharalar kezinde birqatar quqyq buzýshylyq anyqtaldy. О́zen-kólderdiń shomylýǵa arnalmaǵan ári jabdyqtalmaǵan tusynda sýǵa túsý faktileri jıi kezdesedi. Ásirese, ishinde balalar eresekterdiń qadaǵalaýynsyz shomylyp júr», deıdi oblystyq departamenttiń basqarmasy bastyǵynyń mindetin ýaqytsha atqarýshy Daryn Ánýarbekov.
Tótenshelikter sýǵa túsýge baılanysty qaýipsizdik erejelerin buzǵan 44 adamǵa QR Ákimshilik quqyqbuzýshylyq týraly kodekstiń 412-babymen 600 myń teńgeden astam aıyppul salǵan. Jyl basynan beri 4 adam sýǵa batqan. Jantásilim etkenderdiń arasynda 1 bala bar.
