Ult rýhynyń únin dombyra arqyly jetkizgen, rýhanı sabaqtastyq pen tól ónerdi ulyqtaýǵa baǵyttalǵan mádenı oqıǵa el esinde qaldy. Aıryqsha sátte kásibı mýzykanttar, mektep oqýshylary men stýdentter, ónersúıer qaýym bir mezette qos kúıdi oryndap, buryn-sońdy bolmaǵan mýzykalyq rekord ornatty. Atalǵan jetistik Qazaqstan rekordtar kitabynyń bas redaktory Qaırat Tazabekovtiń qatysýymen resmı tirkelip, arnaıy sertıfıkat Jetisý oblysy ákimdigine tabystaldy. Bul – Jetisý jurtynyń ǵana emes, tutas qazaq halqynyń rýhanı ómirindegi eleýli jetistik retinde baǵalandy.
«Bul kún – Jetisý óńiri úshin úlken maqtanysh. Sebebi bastama tek óner merekesi emes, ulttyq birlik pen ortaq murat tóńireginde toǵysqan myńdaǵan adamnyń júrek lúpilin bir arnaǵa toǵystyrǵan rýhanı jańǵyrý kórinisi boldy. Fleshmobqa oblystyń barlyq aýdandary men aýyldarynan, túrli basqarma men mekemeden kelgen qatysýshylar shyn yqylaspen atsalysyp, dombyra arqyly el tarıhyna óz únderin qosty», deıdi oblystyq mádenıet, arhıvter jáne qujattama basqarmasynyń basshysy Qýanysh Sultanov.
Sonymen qatar Jetisý jeriniń tabıǵı-tarıhı kórneki oryndarynda túsirilgen, jeti kúıshi oryndaǵan «Baqtybaıdyń áýeni» atty beınebaıan jurtshylyq nazaryna usynylyp, fleshmobpen biriktirilgen mýzykalyq-vızýaldy týyndy retinde kópshiliktiń kóńilinen shyqty. Bul joba dástúr men zamanaýı ónerdiń jarasymdy úndesýin aıshyqtaǵan erekshe mádenı bastamaǵa aınaldy.
Is-shara barysynda qazaqtyń jyraýlyq-jyrshylyq óneriniń kórnekti ókili Baqtybaı Jolbarysulynyń 190 jyldyǵyna oraı «Baqtybaıdyń áýeni» jáne belgili kúıshi-kompozıtor Ábdimomyn Jeldibaıdyń «Erke sylqym» atty týyndylary oryndaldy.
