Delegasııa basshysy, oblys ákimi Nurymbet Saqtaǵanov birqatar salmaqty kelissóz júrgizdi. ShUAA partııa komıtetiniń hatshysy Ma Sınjýımen, ShUAA Halyq úkimetiniń tóraǵasy Erkin Tunııazben kezdesýde eki óńir arasyndaǵy yntymaqtastyqtyń negizgi baǵyttary atap ótildi.
«Biz óz tarapymyzdan transshekaralyq «Qanas kóli (QHR) – Marqakól – Katonqaraǵaı aýyly» týrıstik baǵytyn birlesip júzege asyrýdy usynamyz. Bul baǵyt eki óńirdiń tabıǵı kórikti jerlerin – Qytaıdaǵy eń tanymal jeti týrıstik orynnyń biri Qanas kólin, Qazaq Altaıynyń injý-marjany Marqakóldi biriktirmek», dedi N.Saqtaǵanov.
Shyǵystaǵy týrıstik aımaqtarda elektr qýatyn tartý, zamanaýı joldar tóseý, ınfraqurylymdy tolyq júrgizý, qonaqúıler salý jóninde belsendi jumys júrgizilip jatyr. Qytaı azamattarynyń óńirdiń tabıǵaty men etnomádenı murasyna degen qyzyǵýshylyǵyn eskere otyryp, kólik qatynasyn qamtamasyz etý maqsatynda Shyǵys Qazaqstan oblysynyń «Úrimshi – О́skemen» baǵytyndaǵy tikeleı halyqaralyq áýe reısin, kelesi jyldan bastap «Qanas – Katonqaraǵaı», «Qanas – Zaısan» baǵyttaryn ashý máselesin qarastyrýdy usyndy.
Oblys ákimi atap ótkendeı, týrızmnen basqa da, ózara tıimdi yntymaqtastyq ornatýǵa bolatyn kóptegen sala kózdelgen, olar – ónerkásip, avtomobıl, arnaıy tehnıka óndirý, aǵash óńdeý, sý energetıkasy, aýyl sharýashylyǵy.
«Áýe qatynasyn ashý, shekaralyq ótkizý beketin iske qosý bastamalaryn júzege asyrý týrızmdi oblys ekonomıkasynyń basym baǵyty retinde damytýǵa serpin berip, Qazaqstan men Qytaı arasyndaǵy dostyq pen áriptestiktiń rámizine aınalar edi», dedi N.Saqtaǵanov.
Qytaı tarapy ózara tıimdi yntymaqtastyqqa daıyn ekendigin bildirdi.
«Biz usynystaryńyzdy qoldaımyz, bul bastamalar óńirimizdiń damýyna oń áserin tıgizedi. Eki tarap arasyndaǵy qarym-qatynasty keńeıtip, qajet bolǵan jaǵdaıda Shyǵys Qazaqstanda ekonomıkalyq, saýda yntymaqtastyǵy jónindegi jumys tobynyń otyrysyn ótkizýdi usynamyz», dedi ShUAA partııa komıtetiniń hatshysy Ma Sınjýı.
Delegasııa Shyńjań-Uıǵyr avtonomııalyq aýdanynda bolyp, Altaı qalasynyń aýmaǵynda ornalasqan «Szıan Szıýn Shan» halyqaralyq taý-shańǵy kýrortymen tanysty. «Szıan Szıýn Shan» – Qytaıda qala ınfraqurylymymen tolyqtaı biriktirilgen jalǵyz taý-shańǵy kýrorty. Kýrorttyń jalpy aýmaǵy 7,5 sharshy shaqyrymdy quraıdy. Munda 8 aspaly jol men 11 lenta ispettes kótergish jumys isteıdi. Olardyń jalpy ótkizý qabileti saǵatyna 16 myń adamǵa deıin jetedi. Sondaı-aq ártúrli deńgeıdegi sportshylarǵa arnalǵan jattyǵý aımaqtary qarastyrylǵan. Kýrort nysandary Halyqaralyq shańǵy jáne snoýbord federasııasy (FIS) tarapynan sertıfıkattalǵan. Bul halyqaralyq deńgeıdegi jarystardy ótkizýge múmkindik beredi. Qazirde kýrort aýmaǵynda ınfraqurylym belsendi damyp keledi. Shańǵy zaly, eki taý qyzmetin kórsetý ortalyǵy, qonaqtarǵa arnalǵan apartamentter, jalpy uzyndyǵy 71 shaqyrym bolatyn jańa trassalar men ózge de nysandardyń qurylysy júrip jatyr.
Oblys basshysy aýdan ákimderine óz óńirleriniń jer bederi men týrıstik áleýetin eskere otyryp, osyndaı taý-shańǵy ınfraqurylymyn damytý múmkindigin qarastyrýdy tapsyrdy. Budan bólek, oblystyq dene shynyqtyrý jáne sport basqarmasyna ShQO sportshylary úshin osy kýrort bazasynda jattyǵý úderisin uıymdastyrý máselesin qarastyrýdy júktedi.
