Jánibek aýdany Oral qalasynan 500 shaqyrym shalǵaı jatyr. Bıyl 3 maýsymda Qamysty aýylyndaǵy aýyzsý munarasy qulap qalǵan edi. Okrýgte aıaq astynan aýyzsý berý toqtap, tótenshe jaǵdaı jarııalandy. Aýdan basshylyǵy tez ýaqytta máseleni qolǵa alyp, jańa sý munarasyn ornatyp, 29 maýsymda turǵyndarǵa aýyzsý berildi.
Qamysty aýyldyq okrýginiń ákimi Oralbek Kenhanovtyń aıtýynsha, ýaqytsha qıyndyq týǵan kezde aýyl turǵyndary sabyrlyq saqtap, túsinistik tanytty. Aýdan ákimi Tımýr Shınııazov, aýdandyq turǵyn úı, kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Rýstam Amanǵalıev aýyl turǵyndarymen kezdesip, jaǵdaıdy baqylaýǵa aldy.
– Jánibek aýdanynda 9 aýyldyq okrýg, 18 eldi meken bar. Onda turyp jatqan 13 960 adamdy sapaly aýyzsýmen qamtý – basty maqsatymyzdyń biri. Búginde halyqtyń 98,5%-y taza sý tutynyp otyr, – deıdi Jánibek aýdany ákiminiń orynbasary Mırbolat Bısenov.
Aýdanda Jánibek, Uzynkól, Eńbekshi aýyldary aýyzsýdy Orda toptyq sý qubyrynan alsa, Talov eldi mekenine qubyr jer ústi sý qoımasynan tartylǵan. Taý, Borsy, Maıtúbek, Qamysty, Tegisshil, Jaqsybaı, Aqoba, Jasqaırat aýyldary taza sýdy jer astynan skvajına arqyly alyp otyr. О́nege, Jumaev, Kóltaban, Qursaı aýyldaryna tirshilik nári blok modýldi keshen arqyly jetedi. Jiger men Aqadyr aýyly turǵyndary aýyzsýdy qudyqtan alady.
– Bıyl Taý, Borsy, Jasqaırat aýyldaryndaǵy aýyzsý qubyryn jańǵyrttyq. Buǵan memlekettik bıýdjetten 929 mln teńge bólindi. Qazir Jaqsybaı men Aqoba aýyldaryndaǵy aýyzsý qubyryn jańǵyrtý jumysy bastaldy. О́nege, Jumaev, Kóltaban, Qursaı eldi mekenderdegi blok modýldi keshenderin de bıyl jóndeýdi josparlap qoıdyq, – deıdi M.Bısenov.
Aýdanda turǵyndardyń jeke baý-baqshasyn sýarýǵa qajetti sýdyń jaıy da oılastyrylǵan. Aıtalyq, Jasqaırat aýylynda sharýashylyqqa paıdalanatyn sý qubyrynyń qurylysy júrgizilmek. Joba qujattary daıyn. Bul aýyzsý qoryn únemdeýge óte qajet.
О́ńirdegi eń úlken Aqjaıyq aýdany turǵyndarynyń 98 paıyzy da taza aýyzsý tutynady. Mundaǵy 45 eldi mekenniń 38-ine sý qubyr arqyly jetkizilse, 7 eldi mekende keshendi blok modýl ornatylǵan.
– Byltyr aýdannyń Qabyl, Tináli aýyldaryna sý qubyryn tarttyq. Úshtóbe, Toǵan aýyldarynda keshendi blok-modýl ornatylyp, turǵyndar taza aýyzsý júıesine qol jetkizdi. Qabyrshaqty aýylyna da jerasty sý kózinen qubyr tartylyp, nysan tolyq iske qosyldy, – deıdi Aqjaıyq aýdanynyń ákimi Murat Serdalın.
Qazir aýdan ortalyǵy Chapaev aýylynda sý qubyryn qaıta jańartý jumysy júrip jatyr. Qurylystyń sapasyn jergilikti bılik qatań qadaǵalap otyr. Biraz ýaqyt buryn merdiger jumysynan kinárat baıqalyp, jergilikti kompanııa qosymsha jumysqa tartylǵan edi. Ázirge jobanyń 80%-y atqarylǵan.
Aýdan basshysynyń aıtýynsha, iske qosylǵanyna 15 jyldan asqan Qaraýyltóbe, Taıpaq, Úshtóbe, Jambyl, Shabdarjap, Alǵabas, Almaly aýyl okrýgterindegi sý qubyrlaryn jańartý josparlanyp otyr. Búginde Qaraýyltóbe aýylynyń sý qubyryn qaıta qurý qujaty jasalǵan, qazir saraptamadan ótip jatyr.
Taza aýyzsý – halyq densaýlyǵy men ómir sapasynyń kepili. Osyny jaqsy túsinetin óńir basshylyǵy keıingi jyldary aýyldyq jerlerdi sapaly aýyzsýmen qamtamasyz etýge erekshe nazar aýdaryp keledi. Keıingi eki jylda Batys Qazaqstan oblysynda 65 aýylǵa taza aýyzsý jetkizilip, jalpy somasy 12,0 mlrd teńgege 60 joba júzege asqan. Bul jumystardyń nátıjesinde 9 myń turǵyn taza aýyzsýǵa qol jetkizgen. Búginde oblysta turatyn aýyl halqynyń 97%-y sapaly aýyzsýmen qamtylǵan, oblystaǵy 307 aýyl taza sý tutynyp otyr.
– 2020–2022 jyldary oblysta 55 áleýmettik nysannyń qurylysy bastalyp, biraq túrli sebeppen jumysy toqtap qalǵan eken. Buǵan qarjylandyrýdyń ýaqytsha kidirýi, qurylys materıaldarynyń jetispeýshiligi, merdigerlerdiń jaýapsyzdyǵy sekildi túıtkilder sebep bolǵan. Olardyń barlyǵyn qatań baqylaýǵa aldyq. Júıeli jumystyń nátıjesinde, búginde joǵaryda atalǵan 55 nysan, onyń ishinde 16 sý qubyry halyqtyń ıgiligine berildi, – deıdi Batys Qazaqstan oblysynyń ákimi Narıman Tóreǵalıev.
Qysqasy, Aqjaıyq óńiriniń aýyl turǵyndary memlekettiń turaqty qoldaýy, júıeli júrgizilgen jumystardyń arqasynda aýyzsýdan taryqpaı otyr.
Batys Qazaqstan oblysy
