Sýretti túsirgender – A.Dúısenbaev, E.ÚKIBAEV
Memleket basshysy jańa shtab-páterdegi jumys kabınetterin, open space aýmaǵyn, aýdarmashylar keńsesin, tóraǵalyq zalyn jáne mýzeı-kitaphana bólmelerin aralap kórdi.
Prezıdent is-sharaǵa jınalǵan qaýym aldynda sóz sóılep, elimizdegi dıplomatııa salasynyń qyzmetkerleri men ardagerlerin kásibı merekelerimen quttyqtady.
– Babalarymyz ǵasyrlar boıy «dala dıplomatııasymen» ómir súrgen. Halqymyzdyń mámilegerlik dástúriniń arqasynda Uly dalada beıbit ómirdiń erekshe úlgisi qalyptasqan. Qurmet pen syılastyq qashanda qasterli qundylyq retinde baǵalanǵan. Erteden kele jatqan osy qaǵıda – syrtqy saıasatymyzdyń myzǵymas tiregi ári aınymas temirqazyǵy, – dedi Memleket basshysy.
Prezıdent Astanada Azııadaǵy ózara is-qımyl jáne senim sharalary jónindegi keńes shtab-páteriniń ashylýyn shyn máninde eleýli tarıhı oqıǵa retinde atap ótti.
– Otyz jyldan asa ýaqyt buryn Qazaqstan Azııadaǵy ózara is-qımyl jáne senim sharalary jónindegi keńesti qurý bastamasyn kóterdi. Bul halyqaralyq qoǵamdastyq tarapynan turaqtylyq pen qaýipsizdikti nyǵaıtý jolynda óńir elderiniń kúsh-jigerin biriktirý úshin der kezinde jasalǵan qadam retinde keń qoldaýǵa ıe boldy. Biz áýel basta tek yntymaqtastyq, ózara túsinistik pen dıalog arqyly ǵana beıbitshilik pen turaqtylyqty saqtap, ósip-órkendeı alatynymyzǵa sendik. Uıymnyń senim sharalaryn nyǵaıtý qaǵıdaty qazirgi zamanda asa ózekti. Azııanyń 90 paıyzyn qamtıtyn jáne álem halqynyń jartysynan astamyn biriktiretin AО́SShK halyqaralyq qatynastardyń damyp kele jatqan arhıtektýrasyndaǵy mańyzdy elementke aınaldy, – dedi Qasym-Jomart Toqaev.
Prezıdent geosaıası shıelenistiń órshýi men kópjaqtylyq qaǵıdattarynyń álsireýi óńirlik jáne jahandyq turaqtylyqqa edáýir qaýip tóndiretinin atap ótti.
– Álem buryn-sońdy bolmaǵan kúrdeli úderistermen betpe-bet kelip otyr. Ony baıyppen zerdelep, tereń túsiný qajet. Shyn máninde, halyqaralyq quqyqtyń negizderi birtindep kúırep, ózderin zań talaptarynan joǵary qoıatyn kúshter paıda bola bastady. Mundaı jaǵdaıda barlyq eldiń halyqaralyq quqyq pen BUU Jarǵysy qaǵıdattaryn qatań saqtap, ortaq normalardy birjaqty tápsirlemeýi mańyzdy, – dedi Memleket basshysy.
Qasym-Jomart Toqaevtyń aıtýynsha, elimiz aýqymdy saıası jáne ekonomıkalyq reformalardy júıeli túrde júzege asyrýǵa nıetti.
– Meniń Prezıdent retindegi ustanymym – elimizde zań men tártip myzǵymas qaǵıdatqa aınalýǵa tıis. Júrgizilgen reformalar nátıjesinde beıbit jınalystar týraly zań jetildirilip, saıası partııalardy tirkeý shegi tómendetildi. Jala jabýdy qylmys sanatynan shyǵaryp, ólim jazasyn alyp tastadyq. Atalǵan sharalar elimizdiń demokratııa qundylyqtaryna, zań ústemdigine árdaıym beıil ekenin kórsetedi, – dedi Qasym-Jomart Toqaev.
Budan bólek, Memleket basshysy elimizde energetıka, kólik jáne sıfrlandyrý salalaryndaǵy ınfraqurylymdy jappaı damytý úshin qabyldanyp jatqan sharalarǵa da toqtaldy.
– Qazaqstan halyqaralyq seriktestermen birge temirjol jáne avtokólik dálizderin, teńiz porttaryn, jalpy tranzıt jáne logıstıka salasyn jańǵyrtýdy belsendi túrde qolǵa aldy. Sıfrlyq transformasııa men jasandy ıntellekt – elimizdiń básekege qabilettiliginiń kepili. Biz elimizdi sıfrlyq memleketke aınaldyrǵymyz keledi. О́ıtkeni jasandy ıntellekt ósimi ınnovasııa men sıfrlyq derbestiktiń negizgi qozǵaýshy kúshi bolady. Osy strategııalyq mańyzy zor salaǵa kúsh-jigerimizdi jumyldyrý úshin Jasandy ıntellektini damytý jónindegi keńes qurdyq. Kóp uzamaı qýatty sýperkompıýterdi iske qosamyz, – dedi Prezıdent.
Sonymen qatar Qasym-Jomart Toqaev aýyl sharýashylyǵyn jańǵyrtýdy taǵy bir strategııalyq baǵyt retinde atady. El ekonomıkasyn ártaraptandyrýǵa jáne azyq-túlik qaýipsizdigin qamtamasyz etýge atalǵan salanyń yqpaly zor.
– Biz jahandyq qosylǵan qun tizbegimen tolyq ıntegrasııalanǵan, sondaı-aq klımat pen ornyqty damý salasyndaǵy maqsattarǵa saı keletin turaqty ekonomıkanyń negizin qalap jatyrmyz. Bul uzaqmerzimdi maqsatqa jetý úshin halyqaralyq seriktestermen tyǵyz yntymaqtastyq qurýǵa múddelimiz. Oraıly sátti paıdalanyp, osy mańyzdy bastamany júzege asyrýǵa úles qosqan dıplomattar qaýymynyń aıryqsha rólin atap ótkim keledi, – dedi Memleket basshysy.
Sóz sońynda Qasym-Jomart Toqaev barsha AО́SShK qatysýshylaryna tabys tilep, Uıymǵa joǵary deńgeıde tóraǵalyq jasaǵany, dıalogti nyǵaıtýdaǵy ólsheýsiz kúsh-jigeri, AО́SShK-niń ınstıtýttyq damýyna qosqan úlesi úshin Qazaqstannyń senimdi dosy – Ázerbaıjan eline alǵys aıtty.
