Torǵaı óńirine saparynda Qazybek Isa birtýar tulǵa, Alash qozǵalysy jetekshileriniń biri, aqyn-aǵartýshy Mirjaqyp Dýlatulynyń 140 jyldyǵyna baılanysty aldymen Jangeldi aýdany Bıdaıyq aýylyna baryp, Ult kósemi kesenesine taǵzym etip, quran baǵyshtady. Budan soń qazirgi ýaqytta boı kóterip jatqan murajaı qurylysymen tanysty. Bul nysan ult kóseminiń ómiri men eńbegine arnalǵan tarıhı-mádenı ortalyqqa aınalmaq.
Sonymen qatar, Májilis depýtaty Bıdaıyq aýylynyń turǵyndarymen kezdesti.
Aýyl turǵyndary kóterme joldardyń sapasy, ishki kóshelerge asfalt tóseý, ınternet pen uıaly baılanystyń álsizdigi sekildi máselelerdi kóterdi.
- Kóterilgen barlyq másele bizdiń jiti nazarymyzda. Bul turǵyndardyń turmys sapasyna tikeleı áser etetin mańyzdy túıtkilder bolǵandyqtan, tıisti memlekettik organdarǵa joldanyp, óz deńgeıinde sheshimin tabýy úshin baqylaýǵa alynady, – dedi Qazybek Isa.
Sapar aıasynda depýtat Aqkól aýylyna arnaıy baryp, Ult ustazy Ahmet Baıtursynulynyń kesenesine taǵzym etti. Sonymen qatar aýyldyq murajaı jumysymen tanysyp, jergilikti turǵyndarmen kezdesti. Jıynda aýylishilik joldardyń jaı-kúıi, baılanys jelisiniń álsizdigi, áleýmettik nysandardyń jaǵdaıy sóz boldy.
Aýyl ardageri Ábsalyq aqsaqal Arqalyqta salynar áýejaıǵa Alash kósemi Mirjaqyp Dýlatulynyń esimin berý jóninde sóz qozǵady. Qazybek Isa bul bastamany óziniń úkimetke jasaǵan depýtattyq saýalynda kótergenin, sondyqtan, ardagerler usynysyn qýana qoldaıtynyn bildirdi.
Qazybek Isa sonymen qatar Amangeldi aýdanyna baryp, belgili qaıratker, jıhankez mesenat Sapar Ysqaq óz qarjysyna turǵyzyp jatqan “Uly dala tulǵalary” keshenin aralap kórdi. Osynda aýdannyń ardagerlerimen kezdesti. Olardyń el jaıy, jer jaıvna baılanysty mańyzdy usynys-tilekteriniń parlamentte qozǵalatynyn jetkizdi. Aýdan ortalyǵyndaǵy ult-azattyq kóterilis kósemi Amangeldi Imanovtyń súıegi jerlengen alańda batyrdyń eskertkishige quran oqydy. Mádenıet salasy qyzmetkerleriniń usynystaryn tyńdap, nazarǵa alatynyn aıtty.
Arqalyqqa bara jatqan jolda halyq batyry Keıkiniń kesenesine arnaıy at basyn buryp, duǵa baǵyshtady.
Arqalyqqa at arytyp jetken Qazybek Isa endi bastalyp jatqan QR Prezıdenti Q.Toqaevtyń Ulttyq quryltaıda jarııalaǵan Astana-Arqalyq-Torǵaı-Yrǵyz joldaryn qosatyn “Ortalyq-Batys” kúre jolynyń jaǵdaıymen tanysty.
Arqalyq qalasynda salynyp jatqan jańa áýejaıdyń ornyn baryp, joba málimetterimen tanysty. 1992 jyly toqtap qalǵan áýejaı qaıta jandanatyn bolady.
Budan soń Qazybek Isa Arqalyqtaǵy “Jaıly mektep” jobasymen salynǵan #7 jalpy mektepke baryp, aralap kórdi.
Sonymen qatar Y.Altynsarın atyndaǵy ýnıversıtetke beriletin, stýdentter sanyn eki ese kóbeıtýge jaǵdaı jasaıtyn burynǵy aýyl sharýashylyq basqarmasynyń kóp qabatty úlken ǵımaratynyń kúrdeli jóndeý jumystary josparymen tanysty. Qaladaǵy burynǵy “Gornıak” mádenıet úıiniń jańadan ashylatyn zamanaýı mádenıet saraıyna aınaldyrý jobasynyń qurylysyn kórdi.
Úsh kúndik jumys saparynyń sońynda Qazybek Isa Qostanaı qalasyndaǵy oblystyq «Qostanaı tańy» gazetiniń redaksııasyna baryp, shyǵarmashylyq ujymmen jáne óńirge belgili qalamger-jýrnalıstermen júzdesti.
Depýtat BAQ-tyń qoǵamdaǵy orny men eldik múddeni qorǵaýdaǵy róline toqtalyp, aqparat salasynda eńbek etip júrgen mamandarǵa tabys tiledi.
Qazybek Isa sapar qorytyndysy boıynsha kóterilgen máselelerdi Májilis qabyrǵasynda kóterip, quzyrly organdardyń qaraýyna usynatynyn jetkizdi.
Qazybek Isamen birge Qostanaı oblysy ákiminiń orynbasary Baqytjan Narymbetov, «Aq jol» partııasynyń Qostanaı oblystyq fılıaly basshylary erip júrdi.
