Anatolıı ıyǵyna ilgen qara shaǵyn sómkesin kórsetip, onda jasandy júrektiń batareıalary saqtalatynyn aıtady. Sómkeden shyqqan elektr symy kıiminiń astymen júrek tusyna ketedi - dál sol jerde júrek jumysyn retteıtin qurylǵy ornalasqan.
«Mine, osyndaı júıelik kontroller ornatylǵan, ol júrekten derek jınaıdy. Júrek tusynda (kórsetip) kishkentaı kompıýter tur, sol kontrollerge aqparat jiberedi. Bir keli batareıany únemi ózimmen birge alyp júremin. Úsh jyldan asty - eń bastysy, tirimin!», - deıdi Anatolıı Kýznesov.
Pasıentke 20 jyldan astam ýaqyt buryn júrektiń ıshemııalyq aýrýy dıagnozy qoıylǵan. Keıin ınfarkt jáne birneshe kúrdeli ota jasatqan. 2022 jyly elordalyq kardıohırýrgter oǵan aortalyq qaqpaqshanyń bıologııalyq protezi men sol jaq qarynshany qoldaıtyn ımplant ornatyp berdi. Mundaı qurylǵymen ómir súretin adamǵa kún saıyn jaıaý júrý aýadaı qajet. Alaıda, Anatolııdiń oń jaq tizesi qatty aýyratyn.
«Júregi aýyratyn naýqas retinde kún saıyn kemi 4 shaqyrym jaıaý júrýim kerek. Qozǵalyssyz qalsam, jaǵdaıym nasharlaı bastaıdy. Tizeme ota jasaı alatyn dáriger izdedim. Túrli konsılıým ótti, biraq bári bas tartyp jatty. Bir jyldan astam ýaqyt tek otaǵa alatyn dárigerdi izdeýmen ótti. Sodan Almaty №4 qalalyq aýrýhanaǵa kelip, Manarbek Ǵazızulyna jolyqtym. Ol ota jasaýǵa kelisim berdi. Reanımatologpen birge meni qarap júrgen elordalyq kardıologtarmen birlese áreket etti. Maýsymnyń 19-y kúni ota jasaldy. Bul óte kúrdeli otanyń biri boldy, óıtkeni men únemi qan suıyltatyn dári-dármek ishemin - ol motordyń jumysy úshin qajet. Dárigerler qan ketýden qoryqqan edi. Biraq bári sátimen bolyp, kóp qan joǵaltpadym, jaǵdaıym jaqsy. Otadan beri on kúnge jýyq ýaqyt ótti - júre bastadym. Tolyq saýyǵý úshin áli de ýaqyt kerek. Uzaq ýaqyt tósekte jatqannan keıin aqyry óz betimmen qozǵala bastadym. Dárigerlerge raqmet! №4 aýrýhananyń búkil ujymyna alǵysym sheksiz. Mundaǵy mamandar - naǵyz altyn qoldy adamdar», - deıdi rııasyz rızashylyqpen Anatolıı Kýznesov.
Naýqas №4 qalalyq klınıkalyq aýrýhanasyna tize býynyna buryn ornatylǵan endoprotezdiń aýyrtyp, qolaısyzdyq týyndatqandyqtan júgingen. Aýrýhana mamandary bul joly da kúrdeli jaǵdaıdy eńserip shyqty.
«Basty qıyndyq - onyń qatar júretin aýyr patologııalary edi: MyVal aortalyq qaqpaqsha bıoprotezi, sozylmaly júrek jetkiliksizdigi, arterııalyq gıpertenzııa, baýyr men búırek qyzmetiniń buzylystary jáne basqa da birqatar kúrdeli aýrýlar. Ota aldynda tolyq klınıkalyq jáne zerthanalyq tekserý, mýltıdıssıplınarlyq daıyndyq júrgizildi. Nátıjesinde ota sátti ótti. Erte ońaltý kezeńinde pasıent táýlik boıy ARQTB-de baqylaýda boldy. Kelesi kúni-aq belsendi ońaltý bastaldy. Búgin ol aýrýhanadan úıge shyqty, jaǵdaıy jaqsy, kún saıyn ózin jaqsy sezine bastaǵanyn aıtady», - deıdi Almaty №4 qalalyq klınıkalyq aýrýhanasy endoprotezdeý bólimshesiniń meńgerýshisi Manarbek Áýbákirov.
Hırýrgııalyq otany travmatologııa-ortopedııa bólimshesiniń meńgerýshisi, joǵary sanatty ortoped-dáriger Manat Áýbákirov jasasa, anestezıologııalyq súıemeldeýdi ARQTB meńgerýshisi, joǵary sanatty dáriger J. Dáýletbekov qamtamasyz etti. Emdeýshi dáriger retinde ortoped-travmatolog J.Orozhan qosyldy. Bul jaǵdaı - asa joǵary hırýrgııalyq qaýipke qaramastan almatylyq mamandar komandasynyń úılesimdi jumysyn pash etti.
«Jasandy júrekpen ómir súrý - múlde bólek jaǵdaı. Kúıeýim sýǵa túse almaıdy, jýynǵany - tek dymqyl shúberekpen súrtinýden aspaıtvn. Qurylǵynyń tútigi bar, kún saıyn tańǵysh aýystyramyz. Kúndiz ıyǵynan sómke túspeıdi, túnde - stasıonarlyq qurylǵyǵa jalǵanady. Bir jarym jyl boıy tize aýrýynan qatty qınaldy. Baldaqpen áreń júretin. Jata bergen soń kóz aldymda qartaıa bastady. Biz barmaǵan jer qalmady - bári qorqyp, bas tartty. Bar bolǵany 1% múmkindik berdi. Biraq biz táýekelge bel býdyq. Dárigerlerge: “Biz sizderge senemiz!” - dedik. О́z basym olarǵa 100% senimdi boldym. Joldasym aman qalatynyn bildim», - deıdi naýqastyń jubaıy Olga Kýznesova.
