– Alena, kópshilik sizdi jeńil atlet retinde ǵana emes, qazaq tilinde erkin sóıleıtin telejúrgizýshi dep te jaqsy tanıdy. Sportty tańdaýǵa ne sebep boldy?
– Sportqa degen mahabbatym bala kezimnen oıandy. Aýyl balasy bolǵan soń, tabıǵatpen etene jaqyn ómir súrdik, júgirip, sekirip óstik. Biraq jeńil atletıkaǵa kásibı túrde bet burýym úsh jyl buryn bastaldy. Osy az ǵana ýaqyt ishinde elimizdiń túkpir-túkpirindegi jarystarǵa qatystym. Ásirese «Masters Kazakhstan» federasııasy uıymdastyratyn týrnırler ómirimde erekshe oryn alady. Tipti Berlın marafonyna da qatysý baqyty buıyrdy. Bul tek sport emes, shynaıy erik-jigerdiń, maqsatkerliktiń mektebi der edim.
– Siz Qaraǵandy oblysyndaǵy Aǵadyr kentiniń týmasysyz. Qazaq tilin jetik meńgerýińiz de kópshilikti tańǵaldyrady. Memlekettik tildi meńgerý sporttaǵy jolyńyzǵa qalaı áser etti?
– Iá, men qazaq mektebinde oqydym. Qazaq tili – janymnyń, bolmysymnyń ajyramas bóligi. Qazir Almatyda turamyn. Ártúrli sporttyq is-sharalardy, marafondardy qazaq tilinde júrgizý men úshin úlken mártebe ári jaýapkershilik. Qazaq tili arqyly kórermenmen, sportshylarmen tereńirek baılanys ornata alamyn. Bul – ulttyq bolmys pen zamanaýı sportty ushtastyrýdyń tamasha úlgisi.
– Aldaǵy josparlaryńyzben bólisseńiz.
– Qazirgi tańda Naiza MMA-promoýshen jobasynda júrgizýshi bolyp eńbek etemin. Sonymen qatar jeńil atletıka boıynsha túrli marafondardy tikeleı efırde qazaq jáne orys tilderinde júrgizemin. Bul men úshin tek jumys emes, úlken mıssııa. Sebebi sport – adamdardy biriktiretin kúsh. Ár efırde halyqtar arasyndaǵy dostyqty, ózara túsinistikti dáripteımin. Bul – Qazaqstan halqy Assambleıasynyń da basty maqsattarynyń biri.
– Sportta shekara, ultqa bóliný bolmaıdy. Sizdiń de osy saladan tapqan qurbylaryńyz kóp ekenin bilemiz.
– Durys aıtasyz, ár jarys – óz aldyna bir tarıh. Jańa adamdarmen tanysý, túrli ulttardyń mádenıetin seziný – naǵyz shabyt kózi. Bizde sport árdaıym dostyqtyń, yntymaqtastyqtyń rámizi. Mine, osy turǵydan alǵanda, «Alatau 2025» halyqaralyq týrnıri biregeı alań. Munda tek sportshylar ǵana emes, ártúrli etnostardyń ókilderi de bir maqsatpen birlik pen damý jolynda birigedi. Bul – Assambleıanyń ustanymdaryn sport alańynda júzege asyrýdyń naqty kórinisi.
– «Alatau 2025» týrnırine qatysa-tyn sportshylar men jankúıerlerge qandaı tilegińiz bar?
– Bul jaı týrnır emes, sport arqyly júrekterdi biriktiretin úlken mereke. Sondyqtan barlyq qatysýshyǵa sáttilik tileımin. О́z múmkindikterińizdi tolyq ashyp, ár sátten lázzat alýǵa tyrysyńyzdar. Al kórermenderge aıtarym: 6–8 shilde kúnderi Almatydaǵy Olımpıadalyq daıarlyq ortalyǵyna kelińizder. Qatysýshylardy qoldap, sport rýhyn birge sezineıik. Bul bizdiń birligimizdiń, mádenıetimizdiń jáne sportqa degen mahabbatymyzdyń jarqyn kórinisi.
– Áńgimeńizge alǵys bildiremiz. Sporttaǵy jáne qoǵamdyq jumysyńyzǵa tek sáttilik tileımiz!
Áńgimelesken –
Qýanysh NURDANBEKULY,
«Egemen Qazaqstan»
