О́kinishke qaraı, ulttyq quramanyń kóshbasshysy, tájirıbeli boksshy Abylaıhan Júsipov (70 kg) alǵashqy aıqasta qyrǵyz boksshysy Almaz Orozbekovpen joly túıisip, jaraqattanýyna baılanysty dodadan shyǵyp qaldy. Qyzdar arasynda Ánel Saqysh (54 kg) ózbek qyzy Ferýza Kazakovaǵa, Eldana Tálipova (80 kg) úndistandyq Ranı Pýıaǵa ese jiberdi.
Álem chempıony Mahmud Sabyrhan 55 kg salmaqta synǵa túsip, alǵashqy aınalymda ońtústikkoreıalyq qarsylasy Shın Chejendi aıqyn eńserdi. Parıj Olımpıadasynyń kúmis júldegeri Nurbek Oralbaı (80 kg) ázerbaıjan boksshysy Mýrad Allahverdıevten basym tústi. Serik Temirjanov ta (60 kg) shırek fınalǵa shyqty. Alǵashqy jekpe-jeginde ol aýstralııalyq Djeıkob Kassardy jeńdi. Ulttyq quramanyń kapıtany, asa aýyr salmaqta dodaǵa qosylǵan Aıbek Oralbaı domınıkandyq Hose Agýstın Trısetpen tartysty. 1-raýndta qabaǵy jarylǵanyna qaramastan, qarsylasyn aıqyn basymdyqpen jeńdi. Tipti 2-raýndta Trıset nokdaýn aldy.
Álem chempıony Sanjar Táshkenbaı (50 kg) álem kýboginiń dodasyn birden shırek fınaldyq saıystan bastady. Japonııa úmiti Shodaı Kotony jeńip, jartylaı fınalǵa ótti. Álem chempıony Bekzad Nurdáýletov (85 kg) te shırek fınaldyq aıqasta Aýstralııa boksshysy Lahlan Loýsennen basym túsip, jartylaı fınalǵa shyqty. Ertýǵan Zeınýllınov (65 kg) túrkııalyq Ahmet Pekelden basym túsip, shırek fınalǵa ótti. Saǵyndyq Toǵambaı (90 kg) amerıkalyq Malakaı Djordesti yǵystyryp, jartylaı fınalǵa shyqty.
Nadejda Rebıas (75 kg) brazılııalyq Vıvıan Dos-Santos Pereırany álem kýboginiń dodasynan yǵystyrdy. Qazaq boksshylarynyń arasynda ázirge úsh dúrkin álem chempıony atanǵan Nazym Qyzaıbaı (48 kg) shırek fınalda ózbek qyzy Farzona Fozılovany súrindirdi. Álem chempıony Alýa Balqybekova (51 kg) amerıkalyq Djenıfer Lozanony jeńip, shırek fınalǵa shyqty. 60 kg salmaqta synǵa túsken Vıktorııa Grafeeva túrik qyzy Gızem Ozerdi yǵystyryp, jartylaı fınalǵa shyqty. Álem chempıony Aıda Ábikeeva da jahandyq dodanyń shırek fınaldyq synynda brıtandyq Dıone Býrmandy jeńdi.
