Sýretti túsirgen – Valerıı Býgaev
Pavlodar oblysy ákiminiń mindetin atqarýshy Serik Batyrǵojınov áleýmettik-ekonomıkalyq ıntegrasııanyń negizgi faktorlarynyń biri retinde shekara mańyndaǵy ózara qarym-qatynastyń mańyzdylyǵyn atap ótti.
«Bizdiń óńirlerdi qolaıly geografııalyq jaǵdaı men tatý kórshilik qatynastar ǵana emes, sondaı-aq biz damytýǵa umtylatyn turaqty ekonomıkalyq qarym-qatynas ta baılanystyrady», dedi ol.
Jıyn barysynda kólik, logıstıka, ónerkásip, agroónerkásiptik keshen salalaryndaǵy áriptestik keleshegi, sondaı-aq mańyzdy transshekaralyq sý arterııasy bolyp tabylatyn Ertis ózeniniń strategııalyq resýrsyn utymdy paıdalaný máseleleri de talqylandy.
Oblys ákiminiń orynbasary Áıgerim Qabyltaeva men Omby oblysy úkimeti tóraǵasynyń orynbasary Andreı Shpılenko tanystyrǵan Pavlodar men Omby oblystarynyń ınvestısııalyq áleýeti yntymaqtastyq úshin negizgi salalardy jáne kásipkerlikti memlekettik qoldaý sharalaryn belgileýge múmkindik berdi.
Sondaı-aq «Sıbır», «Omskaıa», «Elektrotochprıbor», «Agrofırma Tavrıda», «Solıanoe», taǵy da basqa Omby kompanııalarymen baılanystardy nyǵaıtý máseleleri talqylandy. Pavlodar oblysynan Ombyǵa dástúrli túrde alıýmınıı, kómir, glınozem, polıpropılen buıymdary jáne kábil-ótkizgish ónimderi jetkiziledi. О́zara qarym-qatynasty «Qazaqstan alıýmınııi» AQ, «Qazenergokabel» AQ, «Bogatyr Kómir» JShS, «Neftehım LTD» JShS sııaqty ekonomıka flagmandary jáne basqa da kásiporyndar qoldaıdy. О́nimderi Reseı naryǵyna eksporttalatyn «MolKomPavlodar», «Rýbıkom», «Turkey PVL» óńdeý kásiporyndary da joǵary baǵaǵa ıe boldy.
Sondaı-aq mádenıet, bilim, jastar saıasaty jáne sport salasyndaǵy birlesken bastamalarǵa erekshe nazar aýdaryldy. Murajaılar men kitaphanalardyń nátıjeli jumysy, Omby oblysyndaǵy qazaq dıasporasymen ózara qarym-qatynas atalyp ótti. Kezdesý qorytyndysynda óńirler arasyndaǵy ózara yntymaqtastyq týraly memorandýmǵa qol qoıylyp, aldaǵy ýaqytta iske asyrylatyn bastamalar tizbesi kelisildi.
Ertis ózeniniń áleýetin paıdalaný máseleleri boıynsha da jeke jıyn ótti. Onda Kólik mınıstrligi men Sý resýrstary jáne ırrıgasııa mınıstrliginiń ókilderi, sondaı-aq Omby oblysy úkimetiniń músheleri birlesken kólik-logıstıkalyq jáne ekologııalyq jobalardy iske asyrýdy talqylady. Ertistiń sý resýrstaryn utymdy paıdalaný ónerkásiptik, agrarlyq jáne keme qatynasy sektorlarynyń ornyqty damýynyń mańyzdy elementi retinde qarastyrylyp otyr. О́zenniń týrıstik-mádenı áleýeti de atalyp ótti. Keıingi on jylda bul tarapta «Ertis – dostyq ózeni» atty birlesken joba iske asyp jatyr.
Delegasııa músheleri «Pavlodar ózen porty» AQ jumysymen de tanysyp, «Pavlodar» AEA «ÝPNK-PV» JShS, «HAGI-Pavlodar» JShS (Zenith zaýyty) jáne Pavlodar aýdanyndaǵy «Agro-Trade PV» JShS-da boldy.
Pavlodar oblysy
