Foto: QR Týrızm jáne sport mınıstri
Kezdesý barysynda taraptar sport salasyndaǵy ózara is-qımyldyń basym baǵyttaryn, atap aıtqanda, sport kadrlaryn daıarlaý, paralımpıadalyq sportty ilgeriletý jáne ulttyq sport túrlerin birlese damytý máselelerin jan-jaqty talqylady.
Budan bólek, qarasha aıynda Túrkistan qalasynda Qazaqstan men О́zbekstan quramalary arasynda joldastyq fýtbol kezdesýin ótkizý josparlansa, 2026 jyly Astanada ótetin halyqaralyq «Bolashaq oıyndaryna» ózbek delegasııasynyń qatysýy týraly kelisimder pysyqtaldy.
Mınıstr Erbol Myrzabosynov óz sózinde qos el arasyndaǵy tarıhı tamyrlastyq pen mádenı jaqyndyqtyń mańyzyn atap ótti.
«Qazaqstan men О́zbekstan – sport salasyndaǵy strategııalyq seriktester. Bizdi ortaq maqsattar, sondaı-aq tarıhı jáne mádenı baılanystar biriktiredi. Eki el arasyndaǵy praktıkalyq yntymaqtastyqty keńeıtý sport salasynyń damýyna tyń serpin beretinine senimdimin», dedi Erbol Myrzabosynov.
Ol sondaı-aq Astanada boı kótergen Ulttyq sport ýnıversıtetiniń qurylysy aıaqtalǵanyn habarlap, ózbek tarapyn sporttyq bilim berý salasynda yntymaqtastyq ornatýǵa shaqyrdy.
«Qazaqstan Ulttyq Olımpıada komıteti árqashan yntymaqtastyqqa ashyq ári áriptesterimizdiń bastamalaryn joǵary baǵalaıdy. Ásirese, Olımpıadalyq qozǵalys aıasyndaǵy birlesken jumystyń mańyzy zor. Mundaı kezdesýler ózara áriptestikti nyǵaıtyp, elderimizde sportty damytýǵa jańa múmkindikter ashady», dedi Gennadıı Golovkın.
Kezdesý qorytyndysynda eki el ókilderi sporttyq baılanysty odan ári damytyp, turaqty dıalog pen ózara qoldaýǵa negizdelgen seriktestikti jalǵastyrýǵa nıetti ekenin málimdedi.
