«Jolaýshylar tasymaly» AQ vagon parki 30 jańa jolaýshylar vagonymen tolyqty. Petropavldaǵy zaýytta qurastyrylǵan jańa quram alǵash ret búgin Almaty-2 vokzalynan Saratovqa attandy. Olar №7/8 baǵyty boıynsha turaqty qatynaı bastady.
«Kompanııa bas dırektory Anýar Ahmetjanov bul bastamany Memleket basshysynyń tapsyrmasymen júzege asyrylyp jatqan mańyzdy joba retinde atap ótti. «Vagondardy jańartý – kólik ınfraqurylymyn jetildirýdegi basty mindettiń biri. Bul joba óńiraralyq qatynastardy nyǵaıtýda mańyzdy ról atqarady», dedi ol jańa vagondardy tanystyrý rásiminde.
Jańa poıyz quramynda 10 vagon bar: 5 kýpe, 5 plaskart. Bir baǵytta 400-den astam jolaýshyny tasymaldaı alady. Almatydan poıyz jup kúnderi saǵat 20:00-de shyǵyp, Saratova kelesi kúni 10:10-da (Reseı ýaqytymen) jetedi. Qaıtar jolda Saratovtan saǵat 14:55-te shyǵyp, Almatyǵa kelesi kúni tańǵy 06:54-te (Qazaqstan ýaqytymen) keledi.
Vagondar zamanaýı standarttarǵa saı jasalǵan. Kýpelerde ergonomıkalyq jatyn oryndar, jaryqdıodty shamdar, USB porttar men elektr rozetkalar ornatylǵan. Múmkindigi shekteýli jandarǵa arnalǵan arnaıy kýpeler men arba qoıýǵa oryn, sondaı-aq shaqyrý batyrmasy qarastyrylǵan. Qyzmet etý merzimi – 40 jyl.
Kompanııa sońǵy eki jylda 318 jańa vagon satyp alǵan. Onyń 241-i paıdalanýǵa berildi, onyń ishinde jańa Almaty–Saratov baǵytyndaǵy 30 vagon da bar. Jańa quramdar sondaı-aq Atyraý, Pavlodar, Túrkistan, Qyzylorda, Semeı sııaqty baǵyttarda da júrip jatyr.
2025–2027 jyldary taǵy 350 vagon jetkiziledi. Al 2030 jylǵa qaraı jolaýshylar vagondary tolyq jańartylady dep josparlanǵan.
