Jergilikti basylymnyń jazýynsha, qalanyń ústinde alyp tolqynǵa uqsas bulttar paıda boldy. Oqıǵa kýágerleri jelige sýretter men vıdeolar salyp bólisip jatyr. Biri bul kórinisti ádemi dep jatsa, endi biri qorqynyshty bolǵanyn jasyrmady.
- Qala alyp kórpeniń astynda qalǵandaı boldy. Buryn-sońdy mundaıdy kórgen emespin. Aspan teńiz tolqyny sııaqty óz betinshe qozǵalyp jatqandaı sezildi, – deıdi kýágerler.
Aqtaý aspanynan mundaı bulttar birinshi ret kórinip turǵan joq. Osyndaı qubylys 2023 jyly da tirkelgen. "Qazgıdromettiń" oblystyq fılıaly bulttardyń býma tárizdes bolǵanyn túsindirgen bolatyn.
Mamandardyń aıtýynsha, mundaı bulttar kóbinese sýyq fronttardan taralatyn sýyq aýanyń áserinen paıda bolady. Bul sırek kezdesetin tabıǵı qubylysqa jatady.
