«Daryn» respýblıkalyq ǵylymı-praktıkalyq ortalyǵy uıymdastyrǵan bul saıys osymen qatarynan 22 jyl ótip otyr. Qazaqtyń daryndy balalaryn anyqtaý jáne áleýmettik-quqyqtyq qorǵaý, tildi, ádebıetti, tarıhty úırenýge yntalandyrý, qazaq halqynyń mádenıetine qyzyǵýshylyqty arttyrý maqsatyn kózdeıtin is-sharaǵa Qytaı, Mońǵolııa, Túrikmenstan, Qyrǵyzstan, О́zbekstan jáne Reseıden kelgen 40-tan astam oqýshy jınaldy.
Zııatkerlik saıystyń negizin qalaýshylardyń biri – ardager jýrnalıst Súleımen Mámet 1996 jyly Memleket basshysynyń tapsyrmasy boıynsha sheteldik qazaqtardy qoldaý maqsatynda arnaıy sheshim qabyldanǵanyn eske saldy. Ol kezde kóptegen qandasymyz tarıhı Otanyna oralýǵa múmkindik ala bastaǵan.
– Bul olımpıada – shetelde turatyn otandastarymyzǵa rýhanı kópir bola bilgen mádenı-aǵartýshylyq bastama. 22 jyl ishinde ǵylym doktorlary, muǵalimder, dıplomattardyń birneshe urpaǵy ósip-jetildi. Olar halyqtar dostyǵyna qyzmet etip júr. Jyl saıyn balalardyń bilim deńgeıi men ana tiline degen shynaıy súıispenshiligi meni tánti etedi. Bıyl qatysýshylardyń biri ájesiniń sálemin jetkizip, Shámshi Qaldaıaqovtyń ánderin oryndady. Esse jazý kezinde jastar eń aldymen ata jurty – Qazaqstanǵa degen mahabbatyn bildirdi, – deıdi Súleımen Mámet.
Jas shamalary 14 pen 18 jas aralyǵyn qamtyǵan órender olımpıadanyń birneshe kezeńin ótkerdi. Onyń alǵashqysynda esse jazsa, odan keıin «Tarıhı tanym» taqyrybyndaǵy zertteý jobalaryn qorǵap, «Ultymdy súıemin» taqyrybynda kórkem tanystyrylym ázirledi. Sońǵysy mýzykalyq, poetıkalyq nemese teatrlandyrylǵan qoıylym túrinde usynyldy
Qyrǵyz elinen kelgen Arýjan Abýlázız qazaq jáne qyrǵyz tilderiniń uqsastyǵyna qaramastan, ana tiline degen qyzyǵýshylyǵy báseńdemeıtinin aıtty.
– Esse kezeńinde maǵan «Súıikti qalam» taqyryby tústi. Men Bishkek pen Almaty týraly jazdym. Bul shaharlar janyma jaqyn. Qazaq tilin úıde ǵana úırenemin, otbasymyz túgeldeı ana tilimizde sóıleıdi. Anam, ákem jáne ájem kóp kómektesedi. Pavlodarǵa alǵash keldim. Ertis ózeninde qaıyqpen serýendep, jaǵalaýdy aralap, Dostyq úıine bardyq, – deıdi ol.
Jeńimpazdar men júldegerler Oqý-aǵartý mınıstrliginiń I, II, III dárejeli dıplomdarymen jáne «Daryn» respýblıkalyq ǵylymı-praktıkalyq ortalyǵynyń gramotalarymen marapattaldy. Eń úzdik qatysýshylar Á.Marǵulan atyndaǵy pedagogıkalyq ýnıversıtettiń bilim berý granttaryna ıe boldy. Sonymen qatar oblys ákimi atynan barlyq qatysýshyǵa dombyralar tabystaldy.
«Ertis Daryny» óńirlik qosymsha bilim berý oqý-ádistemelik ortalyǵynyń dırektory Azamat Shaımurat olımpıada maqsaty – jer betinde tarydaı shashyrap ketken qazaq balalarynyń basyn qosyp, ana tilderin meńgertý ekenin aıtady.
– «Daryn» respýblıkalyq ortalyǵy ókilderiniń aıtýynsha, bul olımpıada tarıhynda balalardyń esterinde qalatyndaı erekshe syılyq jasaǵan Pavlodar óńiri. Oblys ákiminiń atynan barlyq qatysýshyǵa dombyra syıǵa berildi. Balalarǵa Ertis ústinde teplohodpen saıahat uıymdastyryldy. Sondaı-aq «Almas qylysh» fılmin kórsettik. Osymen atalǵan olımpıada Ertis-Baıan óńirinde ekinshi ret tabysty ótti, – deıdi ol.
Pavlodar oblysy
