Foto: baq.kz
Mınıstrlik Strategııalyq josparlaý jáne reformalar agenttigine qarasty Ulttyq statıstıka bıýrosymen birlesip, ishki jáne kelý týrızmi boıynsha statıstıkalyq derekter jınaý júıesin jetildirý máselesine arnalǵan jumys kezdesýin ótkizdi. Jıynda baılanys operatorlarynan alynatyn aqparatty paıdalana otyryp, statıstıka júrgizýdiń jańa tásilderi talqylandy.
Kezdesý barysynda uıaly baılanys operatorlarynyń derekteri negizinde daıyndalǵan 2024 jylǵy ishki týrıster týraly aldyn ala taldaý nátıjeleri usynyldy. Qatysýshylar otandyq saıahatshylar men týrısterdi sapar uzaqtyǵyna jáne túnegen-túnemegenine qaraı jikteý tásilderi, sondaı-aq qalyptasqan kórsetkishterdiń ashyqtyǵy men shynaıylyǵyn qamtamasyz etýge qajetti ádistemelik ólshemderdi talqylady.
Statıstıkalyq esep júrgizý ádistemesin jańartý qajettiligi qoldanystaǵy esep júıesindegi olqylyqtardan týyndaǵan. Máselen, 2024 jyly Qazaqstanǵa 15,3 mıllıon sheteldik týrıst kelgen, onyń ishinde 10,4 mıllıony el aýmaǵynda bir kúnnen kóp bolǵan. Alaıda olardyń shamamen 9 mıllıony ornalastyrý oryndarynda tirkelmegen, al bul nysandar resmı statıstıkanyń negizgi derekkózi sanalady. Mundaı jaǵdaı sıfrlyq quraldar men jańa derekkózder arqyly esep júrgizý tásilderin keńeıtý qajettigin aıqyn kórsetip otyr.
