Foto: Ashyq derekkóz
«Bes jyl buryn saıası reformalar aıasynda Prezıdent Qasym-Jomart Toqaev aýyl ákimderin tikeleı saılaý mehanızmin engizý týraly bastama kótergen bolatyn. Sonyń nátıjesinde, keıingi jyldary aýyl ákimderiniń korpýsy 100 paıyz jańartyldy. Barlyq 17 oblysta jalpy sany 2 969 ákim saılandy. Olardyń 864-i – ózin-ózi usynǵan úmitkerler, al 283-i – áıelder. Jańa ákimderdiń basym bóligi buryn memlekettik qyzmette jumys istemegenin aıta ketý kerek. Halyq senimine ıe bolǵan azamattardyń qatarynda muǵalimder, dárigerler, sharýalar, kásipkerler, jergilikti kásiporyndar men sharýa qojalyqtarynyń basshylary bar. Búginde aýyl ákimderiniń ortasha jasy – 44 jas. Saılaý nátıjesinde aýyl ákimderiniń korpýsy jan-jaqty jańartyldy», dedi Erlan Qarın.
Memlekettik keńesshiniń aıtýynsha, bul eldegi basqarý júıesin jańǵyrtýǵa baǵyttalǵan reformalardyń bir tarmaǵy ǵana. Aýyl ákimderin saılaýdan keıin endi aýdan jáne qala ákimderin tikeleı saılaý kezeńi bastaldy.
«Memlekettik basqarý júıesin jetildirý úderisi jalǵasyp jatyr. Byltyr barlyq óńirde 45 aýdan ákimin saılaý pılottyq rejımde ótti. Al bıyldan bastap qazirgi aýdan men oblystyq mańyzy bar qala ákimderiniń ókilettikteri aıaqtalýyna qaraı saılaý tikeleı daýys berý arqyly ótkiziledi. Osylaısha, Qazaqstanda saıası reformalardy júzege asyrý úderisi jalǵasyp, memlekettik qyzmet salasynda túbegeıli ózgerister jasalyp jatyr», dedi Memlekettik keńesshi.
Erlan Qarın atap ótkendeı, bul reformalar azamattardyń el basqarýǵa qatysý múmkindigin arttyryp, jergilikti ózin-ózi basqarý ınstıtýttaryn nyǵaıtýǵa baǵyttalǵan. Sonymen qatar, qoǵam men bılik arasyndaǵy senimdilik deńgeıin jańa sapaǵa kóterip otyr.
