Álgi qarajatty qarııa on jyl boıy jınap kelipti. Keıingi ýaqytta densaýlyǵy jıi syr berýine ári jasynyń ulǵaıýyna baılanysty uzaq sapardan, qajylyqtan bas tartýyna týra kelgen. Aıtýynsha, ózi – tyl ardageri. Bala jasynan kolhozda jumys istep, Ekinshi dúnıejúzilik soǵys jyldary jaýdy jeńý jolynda bel jazbaı eńbek etken.
«Mekkege baramyn dep uzaq jyldar zeınetaqymnan jyryp aqsha jınaǵan edim. Al 2022 jyly shetelge shyǵý úshin tólqujat aldym. О́kinishke qaraı, sol jyly qajylyqqa baratyndardyń jasy 65-ten aspaýy kerek degen talap qoıylyp, meni týroperatorlar qabyldamaı qoıǵany. Odan soń densaýlyǵym syr berip, júrip-turýym aýyrlaı bastaǵanyn sezdim. Onyń ústine tanys adamdar ol jaqqa barý úshin janyma adam ertip júrýim kerektigin aıtty. Aqyr sońy qasıetti sapardan bas tartýyma týra keldi», deıdi Saǵyndyq aqsaqal.
Otasqan jarymen uzaq jyldar tútin tútetken. Alaıda taǵdyrdyń jazýymen aralarynda bala bolmaǵan. 2009 jyly zaıyby qaıtys bolǵan soń, jalǵyz qalady. Jalǵyz inisi 69 jasynda ómirden ozǵan. Al anasy 98 jasynda dúnıe salypty. Sondyqtan óziniń uzaq ómir súrýiniń syryn anasynyń teginen daryǵan dep esepteıdi.
«Keıingi ýaqytta sheshem túsime jıi kiredi. Ananyń orny ystyq eken, ony únemi saǵynamyn. Oılana kele, kóp jyl boıy jınaǵan qarajatymdy múgedek bala asyrap otyrǵan otbasylaryna berýdi uıǵardym. Joldastarymnan surastyra júrip, dertke shaldyqqan balalardy taýyp, olardy analarymen birge bir jerge jınadyq. Tirnektep jınaǵan 3,6 mln teńgemdi 120 myń teńgeden bólip, 30 balanyń anasyna ustattym. «Qalqalarym, bul tún uıqysyn tórt bólip, balasynyń ómiri úshin kúresken analar eńbeginiń óteýi dep túsinińder», dep atap aıttym. Ananyń aıaly alaqanyn, onyń óz perzentin ósirip-jetkizýdegi eńbegin dúnıede eshnársemen ólsheı almaısyń», dep tolǵandy tyl ardageri.
Aqsaqal bıyl Jeńistiń 80 jylynda tyl ardageri retinde birjolǵy bıýdjettik tólemdi ala almaǵanyn aıtady. Turyp jatqan qarttar úıiniń basshylyǵynan suraǵanda «Sizder onsyz da memlekettiń qamqorlyǵynda otyrsyzdar, ondaı tólem qarastyrylmaǵan», dep jaýap beripti. Qarııa Jeńiske úles qosqan qarttardy alalaý durys emes dep sanaıdy. Sondyqtan bul sheshimge óziniń qamkóńil bolyp qalǵanyn jetkizdi.
«Al qarttar úıindegi jalpy jaǵdaı kóńilimizden shyǵady. Qaryn toq, kóılek kók. Jalǵyz ózim bir bólmede turyp jatyrmyn. Qyzmetkerlerdiń barlyǵy meıirban, qamqorlyqpen qaraıdy», deıdi ol.
Saǵyndyq ata qazirgi Tereńkól aýdanynda shóp shabýshy, kolhoz esepshisi, brıgadır, kirpish zaýytynyń sheberi, qoıma meńgerýshisi qyzmetterin atqarǵan. Keıin Pavlodarǵa kóship kelip, zeınetke shyqqanǵa deıin alıýmınıı jáne traktor zaýyttarynda eńbek etken. 1988 jyldan beri zeınette. О́mirdiń talaı qıyndyǵyn kórgen aqsaqaldyń múgedek balalarǵa jasaǵan saýapty isi talaıǵa ónege bolarlyq.
Pavlodar oblysy
