Sóz keıipkeri zamanynda jyljymaıtyn múlik jınap, myzǵymaıtyn magnatqa aınalǵan Nıý-Iorktik Fred Tramptyń tórtinshi perzenti. Arǵy tegi paıdaly qazbalardy óndirýge kelgen nemis ımmıgranttarynan. Alaıda otbasynyń aýqatty bolǵanyna qaramastan, Donald ákesiniń kompanııasynda eń tómengi laýazymda qyzmet etip shıraǵan kórinedi.
Alaıda shıraqtyq pen oqýǵa degen qushtarlyq eki túrli dúnıe ekenin 13 jastaǵy Donald mektepten shyǵarylǵanda bir-aq biledi. Sóıtip ákesi ony áskerı akademııaǵa jiberedi. Alaıda talaǵynyń bıti bar talapty ul keıin Pensılvanııa shtatyndaǵy Ýorton bıznes mektebin támamdap, ákesiniń bıznes-ımperııasyna murager bolýǵa basty úmitker atanady.
Tramptyń úlken aǵasy Freddı bızneske emes, ushqysh bolýa umtylǵan. Alaıda ol 1981 jyly ishkilikke salynyp, mezgilsiz qaıtys bolady. Sóıtip Donald Tramp araq ataýlydan sabyndy ezip ishkendeı beti qaıtyp qalady. Aýzyma tatyp almaımyn dep ýáde beredi.
Kásipkerlik jolyn Donald Tramp ákesinen shaǵyn nesıe alyp bastaıdy. «Shaǵyn» degendi tyrnaqshamen sharbaqtap qoıǵanymyz durys. О́ıtkeni magnattan alǵan shaǵyn qarajattyń ózi 1 mln dollardy quraǵan eken. Bul qarjyǵa ol óz aldyna jyljymaıtyn múlik jobalaryn qolǵa alady. Biraz ýaqyt jeke jumys istep, tájirıbe jınaǵan soń, ákesi basqaratyn kompanııaǵa joǵary laýazymmen qaıta oralady.
Alǵashynda Tramp Nıý-Iorktiń shetkeri aýdandarynda qurylys jobalaryn júzege asyrýǵa atsalysyp júredi. 1971 jyly ol otbasy kompanııasynyń tizginin óz qolyna alyp, bas dırektor atanady.
Mańǵaz magnat
Donald Tramptyń tusynda otbasylyq bıznes jańa beleske kóterildi. Ol Brýklın men Kýınstegi turǵyn úı qurylysynan Manhettendegi iri jobalarǵa kóship, eski Commodore qonaqúıin Grand Hyatt sekildi tabysty mekemege aınaldyrdy.
Sol tusta Tramp óziniń eń áıgili ǵımaraty – 68 qabatty Trump Tower-di saldy. Keıin bul qatarǵa Trump World Tower, Trump International Hotel jáne basqa da ǵımarattar qosyldy.
Artynsha qonaqúı jáne kazıno jelisin de jetkizem dep jelpindi. Degenmen bul saladaǵy isi tórt márte bankrotqa ushyrady. Aram aqsha qashan berekeli ákelip edi?
Sol kezde Tramp shoý-bızneske de aralasty. 1996–2015 jyldar aralyǵynda ol «AQSh arýy» jáne «Ǵalam arýy» sulýlyq baıqaýlarynyń ıesi boldy. 2003 jyly NBC telearnasynda ózi prodıýserlik etip, júrgizýshisi bolǵan «Kandıdat» realıtı-shoýyn bastady. Kınoǵa da kóptep tústi. Áıgili «úıde jalǵyz qalǵanda» fılmindegi Kevınge jol kórsetip jiberetin epızodtyq róldi Donald Tramp oınap shyqqan.
Bul baǵdarlamada qatysýshylar Tramptyń bıznes-ımperııasynda menedjer bolý úshin baq synaıtyn. «Qaı jeńgeniń meniki» deıtin osy shyǵar bálkim. 14 maýsym ishinde mıllıarder NBC arnasynan 213 mln dollar tabys tapty.
Ol birneshe kitap jazyp, moıyndaǵy galstýkten bastap bótelkedegi sýǵa deıin túrli taýarlar satatyn saýda jelisine ıelik etti. Forbes jýrnaly Tramptyń baılyǵyn 3,7 mıllıard dollar dep baǵalasa, ózi bul sandy «10 mlrd» deıdi.
Jubaılar «jyry»
Tramp ómirinde úsh ret úılenipti. Áıgili jubaılarynyń ishindegi eń tanymaly – chehııalyq sportshy ári model Ivana Zelnıchkova. Olardyń úsh balasy bolady: kishi Donald, Ivanka jáne Erık. Alaıda 1990 jyly erli-zaıyptylar dám-tuzy jaraspaı ajyrasyp tynady.
Keıin 1993 jyly Tramp aktrısa Marla Meıplzben shańyraq kóterip, olardan Tıffanı esimdi qyzy dúnıege keldi. On alty jyldan keıin olar da ajyrasamyz dep sheshedi.
Qazirgi jary – slovakııalyq model Melanııa Knaýss. Ekeýi 2005 jyldan beri birge. Bul juptyń uly – Berron Ýılıam Tramp.
Tramptyń birinshi nekeden tarydaı shashyraǵan balalary búginde Trump Organization dep atalatyn otbasylyq bıznesti basqarýǵa kómektesip júr. Biraq kompanııanyń resmı jetekshisi áli de Donald Tramptyń ózi.
Saıasattaǵy alǵashqy saıahat nemese «Obamaǵa obal boldy»
Donald Tramp prezıdent bolamyn degen peıilin alǵash ret 1987 jyly bildirgen. Tipti 2000 jyly Reforma partııasynyń atynan praımerızge qatysyp kórip, keıin óz kandıdatýrasyn qaıtaryp aldy.
2008 jylǵy saılaýdan keıin, ıaǵnı Barak Obama jeńiske jetken soń, Tramp onyń AQSh-ta dúnıege kelmegenin aıtyp, Konstıtýsııaǵa saı prezıdent bola almaıtynyn alǵa tartty.
Alaıda keıin bul teorııa resmı túrde teriske shyǵaryldy: Obamanyń Gavaı araldarynda týǵany dáleldendi. Saılaýaldy naýqan kezinde Tramp buǵan qatysty qateleskenin moıyndaǵanymen, Obamadan obal boldy dep keshirim suraǵan joq.
2015 jyldyń maýsymynda Tramp prezıdent bolýǵa resmı túrde belin bekem baılady. «Bizge bul eldi qaıtadan uly etetin adam kerek. Bul qolymyzdan keledi», dep jar saldy jahanǵa ol sol joly.
Ol saılaý naýqanyn ózgelerden aıyrmashylyǵy – eshkimniń qarjylaı qoldaýyna muqtaj emestigin aıtyp bastady. «Iаǵnı men eshkimniń múddesin kózdep otyrǵan joqpyn», dedi ol.
Onyń kóptegen málimdemeleri men usynystary qoǵamda qarsylyq týǵyzsa da, Tramp praımerızde qarsylastaryna esh múmkindik bermeı, saılaýǵa Respýblıkalyq partııa atynan úmitker retinde shyqty.
Sóıtip 2017 jyly Aq úıdiń tabaldyryǵyn Prezıdent bolyp attady. Araǵa tórt jyl salyp tizgin 79 jastaǵy Djo Baıdenge ótti. Alaıda bireý attan túsip berse de, ataǵynan túsip bere me? Ol aralyqta da Tramp belsendiligin óshirmeı, saıası naýqanyn júrgize berdi. Nátıjesinde 2025 jyly Prezıdent ornyna qaıtadan qonjıdy.
