Foto: Ashyq derekkóz
Jańa zań aıasynda QR Densaýlyq saqtaý mınıstrliginiń Medısınalyq jáne farmasevtıkalyq baqylaý komıtetine (MFBK) medısınalyq qyzmetterdiń sapasyna qadaǵalaý jasaý jáne jedel den qoıý sharalaryn qabyldaý ókilettigi berildi. Bul qadam zańsyz nemese sapasyz kórsetilgen medısınalyq qyzmetterge jyldam aralasýǵa, ári pasıentterdiń qaýipsizdigin qamtamasyz etýge múmkindik beredi.
MFBK endi sotqa júginbeı-aq, uzaq kelisimdersiz óreskel zań buzýshylyqtarǵa dereý áreket ete alady. Bul ózgeris medısınalyq kómek kórsetý kezindegi qaýipsizdik sharalaryn kúsheıtýge jáne densaýlyq saqtaý júıesinde azamattardyń quqyqtaryn tıimdi qorǵaýǵa baǵyttalǵan.
Qazirgi ýaqytta Komıtet zańsyz medısınalyq qyzmet kórsetý, ruqsatsyz jumys isteý, sondaı-aq medısınalyq standarttar men erejelerdi óreskel buzý faktilerin anyqtap, tıisti sharalar qabyldap keledi. Jańa zań normalary bul jumysty áldeqaıda nátıjeli júrgizýge jol ashpaq.
