Foto: Ashyq derekkóz
Komıtettiń málimetinshe, alaıaqtar azamattarǵa qońyraý shalyp, ózin UQK nemese basqa da memlekettik organdardyń qyzmetkeri retinde tanystyrady. Olar jalǵan málimet berip, azamattyń bank shotynda kúmándi operasııalar tirkelgenin nemese «tergeý isi júrip jatqanyn» habarlaıdy. Keı jaǵdaıda, «terrorızmniń jolyn kesý úshin» dep, shuǵyl áreket etýdi talap etedi.
«Jeke jaǵdaılarda alaıaqtar ulttyq qaýipsizdikke degen boljamdy qaýip-qaterdi negizge ala otyryp, terrorızm áreketin toqtatý úshin áreket qajet dep málimdeıdi. Shynaıylyq úshin jalǵan kýálikterdi (mysaly, messendjerdegi beıne qońyraýlar arqyly) kórsetedi nemese UQK logotıpi bar jalǵan qujattardy jiberedi. Áńgime barysynda olar azamattardy aqshalaryna qaýip tónip turǵanyna sendirip, qorǵanysh nemese tekserý úshin qarajatty qaýipsiz shotqa aýdarýdy usynady. Keıde olarǵa jınaqtaryn qutqarý úshin nesıe alýǵa keńes beriledi, sodan keıin aqsha qylmyskerler baqylaıtyn shottarǵa aýdarylady», delingen habarlamada.
Alaıaqtar munymen toqtap qalmaı, jumysqa ornalasýǵa járdemdesý, turmystyq máselelerdi sheship berý sııaqty «qyzmetterin» aqyly túrde usynyp, taǵy bir alaıaqtyq tásilin qoldanyp júr.
UQK bul áreketterdiń QR Qylmystyq kodeksiniń 190-baby (Alaıaqtyq) jáne 385-baby (Jalǵan qujattardy jasaý jáne paıdalaný) boıynsha qylmys ekenin eskertedi.
Komıtet ókilderi quqyq qorǵaý organdary eshqashan azamattarǵa telefon arqyly habarlasyp, shottarǵa aqsha aýdarýdy talap etpeıtinin resmı túrde málimdedi. Terrorıstik qaýip degen syltaýmen jasalatyn mundaı usynystardyń bári alaıaqtardyń áreketi.
