Sýretti túsirgen – Jumabaı MUSABEK
Eskeldi aýdanynda atalyp ótken Alqap kúninde sóz alǵan oblystyq aýyl sharýashylyǵy basqarmasynyń basshysy Nurdáýlet Kenenbaevtyń aıtýynsha, bul daqyldar fermerlerge ekonomıkalyq turǵydan tıimdi. Sonymen qatar sý únemdeýge múmkindik beretin sýarýdyń dıskretti ádisi usynylyp otyrǵan kórinedi. Sharany uıystyrýǵa muryndyq bolǵan «Dúısembınov A.K.» sharýa qojalyǵynyń jetekshisi Aıdyn Dúısembınovtiń sózinshe, atalǵan maıly daqyldar jergilikti klımatqa beıim ári ónimdiligi joǵary deıdi. Sharýa qojalyǵy qazir 4 sharýashylyqty biriktirip, 50 aýyl sharýashylyǵy tehnıkasyn paıdalanyp, 50 adamdy turaqty jumyspen qamtyp otyr.
Alqap kúni aıasynda fermerler, aýyl sharýashylyǵy salasynyń sarapshylary jáne tehnıka óndirýshi kompanııalar arasynda tikeleı pikir almasýǵa múmkindik týdy. Qatysýshylar sýdy tıimdi paıdalaný, daqyl ónimdiligin arttyrý, tehnıka parkin jańartý, sondaı-aq ǵylym men bıznestiń ózara yntymaqtastyǵy taqyryptarynda ózara tájirıbe bólisti. Jıyn barysynda Kóksý aýdanynan kelgen sharýalardyń kól-kósir eńbegi de elenbeı qalǵan joq. Kóksý jurty bıyl da jerdi ıitip, dán seýip, tirshilik tamyryna qan júgirtti. Aýdanda 31 382 gektarǵa aýyl sharýashylyǵy daqyldary egilgen. Dándi daqyldar – 10 500 gektarǵa, maıly daqyldar 11 478 gektarǵa egilgen. Maıburshaq pen kúnbaǵys ta jaıqalyp tur. 1 822 gektar alqapqa qant qyzylshasy egilgen.
«Qant qyzylshasy men maıburshaq, Balpyq bıdiń teriskeıinde jaıqalǵan bıdaı jáne Labasydaǵy júgeri alqaptary jiti nazarda. Búginde agrarlyq sala – eskishe qara ketpenmen emes, tyń tásil, jańa úlgimen júzege asyrylatyn kúrdeli júıe. Sýarý, tyńaıtqysh berý, zııankeske qarsy sharalar syndy agrotehnıkalyq talaptardy qatań saqtaý kerek. Bul berekeli ónimniń alǵysharty ekenin umytpaǵan jón», deıdi aýdan ákimi Dáýlet Halelov.
Búginde Qabanbaı aýylynda qyzý tirlik. Jer baýyryn shańdatqan soqalar men dán sepkish tehnıkalardyń gúrili kóńilge senim uıalatady. «Kóktemniń bir kúni jylǵa azyq» dep senetin dıqandardyń qımyly shıraq. Sol qatarda Mashen Baızaqovtyń egis alqabyna da soqa tisi tıgeli biraz bolǵan. Kóktemgi mamyrajaı kúnmen birge qarbalas jumys bir toqtaǵan emes. О́ıtkeni bıyl sharýashylyqtyń egis kólemi artyp, jumys aýqymy ulǵaıa túsken eken.
«350 gektar jerdi quraıtyn egis alqabymyz sýarmaly jáne tálimdi bolyp bólinedi. Onyń 150 gektaryna qant qyzylshasyn, 200 gektaryna maı burshaq sebýdi josparladyq. Tehnıka, tuqym, tyńaıtqysh pen dári-dármek qorymyz jetkilikti. Kóktemgi egis naýqanyna qajetti tehnıkalar tolyq jóndelgen. Egis jumysyn erterek aıaqtaımyz degen senimdemiz», deıdi sharýashylyq basshysy.
Jetisý oblysy
