Foto: egemen.kz/ Erlan Omar
Mınıstrdiń aıtýynsha, memlekettik bıýdjettiń kirisi shamamen 11 trln teńge bolǵan. Al respýblıkalyq bıýdjet 31 mlrd teńgeden asa artyǵymen oryndalyp, 100,5% atqarylǵan. Bul kórsetkish ımportqa salynatyn qosylǵan qun salyǵy, shıki munaıǵa eksporttyq kedendik baj jáne korporatıvtik tabys salyǵy túsimderiniń esebinen tirkelgen.
Jergilikti bıýdjetter de senimdi ósim kórsetken kirister 117% nemese 656,6 mlrd teńgege jetken. Úkimettiń baspasóz qyzmetiniń habarlaýynsha, jospardyń artyǵymen oryndalýy jeke tabys salyǵy, korporatıvtik tabys salyǵy jáne áleýmettik salyq esebinen qalyptasqan. О́tken jyldyń 6 aıymen salystyrǵanda kiristerdiń ósý qarqyny memlekettik bıýdjet boıynsha - 118,8%, onyń ishinde respýblıkalyq bıýdjet boıynsha - 122% jáne jergilikti bıýdjet boıynsha - 114,3% quraǵan.
Sonymen qatar, salyqtyq, kedendik ákimshilendirýdiń arqasynda 492 mlrd. teńge qosymsha túsimder túsken. Jyl basynan beri qosylǵan qun salyǵyn qaıtarý kólemi, ótken jyldyń deńgeıinen 12% artyq oryndalyp, 768 mlrd teńgeni quraǵan.
«Bul jaı ǵana sıfrlardyń ósýi emes – bul ekonomıkaǵa ótimdiliktiń naqty aǵyny, eksporttaýshylardy, óndirýshilerdi jáne agrarıılerdi qoldaý bolyp sanalady. Mundaı serpinge, qosymsha qun salyǵyn qaıtarýdyń jeńildetilýimen jáne eksporttaýshylardyń ótinimderin basymdyq bere otyryp qaraýmen qol jetkizildi. 2025 jyly ótemaqylardyń jalpy kólemi shamamen 2 trln teńge deńgeıinde bolady boljanyp otyr», dedi Mádı Tákıev.
