Mınıstrdiń málimetinshe, 2025 jyldyń qańtar–mamyr aılary aralyǵynda negizgi kapıtalǵa salynǵan ınvestısııa kólemi 19,3 paıyzǵa artty. Bul ósim, ásirese, bolashaq ekonomıkasyn quraıtyn salalarda aıqyn kórinis tapty. Máselen, bilim berý salasyna quıylǵan ınvestısııa 3,5 esege kóbeıse, qarjy jáne saqtandyrý qyzmeti – 86,2%-ǵa, óńdeý ónerkásibi – 48,9%-ǵa, densaýlyq saqtaý – 32,8%-ǵa, kólik salasy – 16,2%-ǵa ulǵaıǵan.
Syrtqy saýdada da oń ózgerister bar. Atalǵan kezeńde elimizdiń syrtqy saýda taýar aınalymy $53,5 mlrd-ty qurap otyr. Onyń ishinde eksport kólemi $29,8 mlrd-qa jetse, sonyń $10,2 mlrd-y óńdelgen ónimderge tıesili. Al ımport 2,2 paıyz ósip, $23,8 mlrd-ty qurady.
Úkimet otyrysynda astyq tasymalyna qatysty da naqty derekter aıtyldy. Bıylǵy bes aıda 11,8 mln tonna astyq pen un eksporttaldy. Onyń ishinde 9 mln tonnasy – taza astyq. Bul – sońǵy 13 jyldaǵy eń joǵary kórsetkish. Astyq eksportynyń negizgi baǵyttary – О́zbekstan, Tájikstan, Iran jáne Ázerbaıjan.
«Syrtqy saýdanyń jalpy tómendeýine qaramastan, Qazaqstan $6 mlrd kóleminde oń saýda balansyn saqtap otyr», dedi Serik Jumanǵarın.
Úkimet músheleri bul kórsetkishterdiń el ekonomıkasyn ártaraptandyrý men óndiris qýatyn arttyrýda mańyzy zor ekenin atap ótti.
