Ol qaıǵyly jaǵdaılardyń aldyn alý úshin turǵyndarǵa qandaı saqtyq sharalaryn saqtaý kerektigin túsindirdi.
Qutqarýshylardyń aıtýynsha, mundaı oqıǵalar kún jyly kezde jıileı túsedi.
- Kún jylyna salysymen, terezelerdi ashyp qoıyp jatady. Dál osy ýaqytta balalar qulap ketetin jaǵdaılar bastalady. Keı kúnderi 4 balaǵa deıin qulap jatsa, keıde bir balaǵa qatysty jaǵdaı tirkeledi. Budan eshkim saqtandyrylmaǵan – bul jańa turǵyn úıde de, eski kópqabatty úıde de bolýy múmkin. Terezesi bar kez kelgen úıde bala qaraýsyz qalsa, terezede arnaıy qorǵanys qurylǵylary bolmasa, mundaı jaǵdaıdyń bolýy ábden yqtımal. Qalada belgili bir aýdanǵa ǵana tán jaǵdaı dep aıtýǵa kelmeıdi. Balalar ekinshi qabattan da, on tórtinshi qabattan da qulap jatady, – deıdi Janat Kamerdenov.
Onyń aıtýynsha, qazirgi tańda mundaı qaýipterdiń aldyn alýǵa arnalǵan túrli qurylǵylar bar.
- Qaýipsizdikti qamtamasyz etýge arnalǵan arnaıy tehnıkalyq quraldar bar – temir torlar, tipti qorǵanys torlar da qoldanylady. Arnaıy kúsheıtilgen masa torlary bar, olardy óte myqtap ornatady, tipti eresek adam da syndyra almaıdy. Sonymen qatar terezeniń ashylýyn shekteıtin arnaıy qorǵanys symdary bar, olardy ornatý arqyly terezeni tolyq ashýǵa múmkindik bolmaıdy, – dep túsindirdi TJD ókili.
Sondaı-aq, ol ata-analardy balalarmen tereze janynda oınaýdyń qaýiptiligi jaıynda sóılesýge shaqyrdy.
- Tereze mańyna jıhaz, oryndyq, ústel qoımaý kerek. Balalardy páterde jalǵyz qaldyrmańyzdar, búldirshinder úıde bolǵan kezde terezelerdi qatty ashyp qoımańyzdar. Balalardyń tereze aldyna shyǵýyna jol bermeńizder. Qaýiptiń aldyn alý úshin arnaıy tehnıkalyq quraldardy qoldanyńyzdar, – dedi Janat Kamerdenov.
Aıta keteıik, balanyń terezeden qulap ketýine sebep bolǵan ata-analar nemese qamqorshylardyń áreketi naqty jaǵdaıǵa baılanysty Qazaqstan Respýblıkasynyń Qylmystyq kodeksindegi túrli baptar boıynsha jaýapkershilikke tartylýy múmkin.
Mysaly, eger bala qaraýsyz qalyp, terezeden qulap ketse, bul QK-niń 125-baby – "Qaýipti jaǵdaıda qaldyrý" boıynsha qaralýy múmkin. Al eger balanyń jaraqattanýyna ata-ananyń nemquraılylyǵy sebep bolsa, bul QK-niń 156-baby –"Tárbıe berý mindetterin oryndamaý" boıynsha saralanýy yqtımal.
