2010 jyly Qazaqstan men BAÁ arasyndaǵy úkimetaralyq kelisim negizinde qurylǵan «ADCB» Islam banki – TMD keńistigindegi alǵashqy ıslam banki. 15 jyl ishinde qarjy ınstıtýty elimizdegi túrli jobalarǵa 3 mlrd dollardan astam qarajat salǵan. Solardyń qatarynda Atyraýdaǵy polıetılen óndiretin zaýyt (Silleno), AtMО́Z ben PMHZ-da sýtegi men azot óndirý qondyrǵylary, temirjol ınfraqurylymyn jańǵyrtý sııaqty iri jobalar bar.
Bank sondaı-aq «Damý» qorymen birlesip, ekonomıkanyń basym sektorlaryndaǵy kásipkerlerge 25 mlrd teńge baǵyttaǵan. Qor basshysy Farhat Sársekovtiń aıtýynsha, bıznes tarapynan ıslamdyq qarjylandyrý quraldaryna qyzyǵýshylyq joǵary.
Kezdesý barysynda taraptar ıslam bankıngin Qazaqstannyń salyq zańnamasymen úılestirý joldaryn jáne yntymaqtastyqty keńeıtý perspektıvalaryn talqylady. ADCB ókilderi bolashaqta qazaqstandyq jobalarǵa qarjylandyrýdy ulǵaıtýdy josparlap otyrǵandaryn jetkizdi.
Serik Jumanǵarın bankke agroónerkásip kesheni, ásirese mal sharýashylyǵy baǵytyna ınvestısııa quıýdy usyndy. Sebebi Qazaqstan Taıaý Shyǵys elderine joǵary sapaly et ónimderin turaqty eksporttap keledi ári bul naryq perspektıvaly baǵyt retinde baǵalanyp otyr.
