О́tken senbide «Qazaq eli» monýmenti aldyndaǵy alańda Astana qalasynyń ákimi Ádilbek Jaqsybekov Ulttyq biryńǵaı testileýdiń nátıjesi boıynsha óz bilimderin dáleldegen elorda túlekterine «Altyn belgi» tósbelgilerin tabystady.
Dástúrli Altyn belgi tósbelgilerin tabystaý rásimine Qazaqstan Respýblıkasy Parlamentiniń depýtattary, qalalyq máslıhat depýtattary, Bilim jáne ǵylym mınıstrliginiń ókilderi qatysty. Ákim mektep bitirýshilerdi úlken ómir saparyna bastaǵan ataýly kúnmen jáne bilimderin rastaıtyn alǵashqy qujatty alýlarymen quttyqtady. Qala basshysy, sondaı-aq, bıyl Altyn belgi ıegerleriniń sany 84-ten 111 túlekke deıin óskenin atap kórsetti.
Astana qalasynda bıyl Ulttyq biryńǵaı testileýge 3399 túlek qatysty. Olardyń 111-i
Altyn belgi ıegeri atandy. Aıta keteıik, №59 orta mekteptiń túlegi Rıana Mustafına UBT qorytyndysy boıynsha 125 balǵa qol jetkizdi.
Sonymen qatar, №10 jáne №70 orta mektepteriniń eki túlegi 124 ball enshiledi. UBT qorytyndysy boıynsha Astana qalasy boıynsha ortasha kórsetkish 86,26 balldy qurady. 2015 jyly elorda alǵashqy ret UBT-nyń kompozıttik ındeksi boıynsha elimizdiń basqa aımaqtarynyń arasynda birinshi oryndy ıelendi.
Ádilbek Jaqsybekov jyldar boıy oqýshylarǵa sapaly bilim, sanaly tárbıe bergen ata-analar men muǵalimderge alǵys bildirdi.
– Elordada bilim deńgeıi jyldan-jylǵa artyp kele jatqany qýanyshty jaıt. Astana bilim sapasy boıynsha elimizde birinshi orynda tur, – dedi ákim.
Sonymen qatar, qala basshysy elimizde 2011-2020 jyldarǵa arnalǵan bilim salasyn damytýdyń memlekettik baǵdarlamasy oıdaǵydaı júzege asyrylyp jatqanyn atap ótti. Onyń pikirinshe, jaqynda ǵana Bilim jáne ǵylym mınıstrligi men Astana qalasynyń ákimdigi arasynda bekitilgen 2015-2017 jyldarǵa arnalǵan bilim júıesin jetildirýge baǵyttalǵan memorandým da qalamyzda bilim sapasyn arttyrýǵa septigin tıgizbek.
– Astanada bilim salasynyń damýyna ınfraqurylymdyq damý jaǵdaıy da oń áser etedi. 17 jyldyń ishinde elordada 44 mektep salyndy. Sonymen qatar, bıyl 5075 orynǵa eseptelgen jalpy bilim beretin 5 mektep pen 1050 oryndyq mektepke qosymsha ǵımarat salynbaq, – dedi elorda basshysy.
Ákimniń atap ótýinshe, elimizde bilim salasyn damytýǵa Memleket basshysy erekshe nazar aýdarady. Búgingi kúnniń ózinde-aq oń nátıjelerdi baıqaýǵa bolady. Ústimizdegi jyldyń qorytyndysy boıynsha 399 oqýshy halyqaralyq olımpıadalar men ǵylymı jarystarǵa qatysty, sonyń ishinde 238-i medaldarmen marapattaldy.
– Búginde elordada elimizdegi aldyńǵy qatarly joǵary oqý oryndary ornalasqan, olardyń esikteri sizder úshin árdaıym ashyq jáne bul mekemelerde otandyq jáne sheteldik bilikti mamandar jumys isteıdi, – dedi ákim.
Sýretterde: keshten kórinister.
Jylqybaı JAǴYPARULY,
«Egemen Qazaqstan».
Sýretterdi túsirgen
Erlan OMAROV.
