Is-shara barysynda qatysýshylar zań shyǵarý organdary arasyndaǵy tájirıbe almasýdyń turaqty alańyn qurý, memlekettik basqarý salasyndaǵy ózara is-qımyldy arttyrý, ekonomıka jáne saýda salalaryndaǵy ózara tıimdi yntymaqtastyqty keńeıtý, BUU-nyń 2030 jylǵa deıingi kún tártibin iske asyrýǵa yqpal etý, sondaı-aq «Shanhaı rýhyn» ilgeriletý jáne jahandyq basqarý júıesindegi uıymnyń úlesin talqylady.
Semınarda sóılegen sózinde Darhan Qydyralı qazirgi álemdegi qarqyndy ózgerister jaǵdaıynda mundaı semınardyń ózektiligi men mańyzyn erekshe atap ótti.
«Bul shara – Shanhaı yntymaqtastyq uıymyna múshe elderdiń zań shyǵarýshy organdary arasyndaǵy dıalog úshin biregeı alań. Munda tájirıbe almasyp, ózekti máselelerdi sheshýdiń ortaq tásilderin aıqyndaýǵa múmkindik bar. Zań shyǵarýshy organdar turaqtylyqty qamtamasyz etý men strategııalyq sheshimderdi iske asyrýda mańyzdy ról atqarady. Biz, halyq ókilderi retinde, senimdilik ahýalyn qalyptastyryp, ıdeıalar almasýǵa yqpal ete alamyz, ShYU bastamalaryna qoǵam tarapynan qoldaý bildirýge jaǵdaı jasap, kópjaqty yntymaqtastyqtyń mańyzyn túsindire otyryp, ony tereńdetýge qolaıly saıası orta qalyptastyra alamyz. Zań shyǵarýshy organdar arasyndaǵy dıalogty damytý elderimiz ben halyqtarymyz arasyndaǵy yntymaqtastyqty nyǵaıtýǵa eleýli úles qosady», – dedi ol.
Sapar aıasynda QHR-dyń Búkilqytaılyq halyq ókilderi jınalysy Turaqty komıteti tóraǵasynyń orynbasary Pen Sınhýa myrzamen kezdesý ótti. Kezdesýde taraptar ekijaqty yntymaqtastyqty odan ári damytý máselelerin talqylady.
Sondaı-aq qazaqstandyq depýtattar Sınszıan-Uıǵyr avtonomııalyq aýdanyna baryp, óńirlik halyq ókilderi jınalysy Turaqty komıtetiniń dırektory Zýmrat Obýlmen kezdesti.
