Prezıdent jarııalaǵan «Jumysshy mamandyqtar jyly» aıasynda taý-ken metallýrgııa kesheniniń eńbekkerlerine, onyń ishinde metallýrgterge erekshe kóńil bólinedi. Bıyl Memleket basshysy alǵash ret metallýrgterge arnalǵan eki jańa memlekettik nagrada taǵaıyndaǵany belgili. Munyń bári metallýrgııa salasyna degen zor qurmet ekeni sózsiz.
Sondaı adal eńbegimen, alǵa basyp kele jatqan jumysshy mamandardyń biri – Aıagóz aýdanynyń turǵyny, metallýrg Altynbek Ysqaqov. Ol búginde elimizge belgili Aqtoǵaı ken baıytý fabrıkasynda jumys isteıdi.
«Men KAZ Minerals kompanııasyna qarasty Aqtoǵaı ken baıytý fabrıkasynda 2016 jyldyń qazan aıynan beri eńbek etip kelemin. 10 jyldaı boldy. Kompanııa jumysshy kadrlarǵa erekshe mán beredi. Birinshiden, bos jumys bolsa, Abaı oblysynyń halqyn jumyspen qamtýǵa tyrysady. Ekinshiden, «Tálimger» degen baǵdarlamamen joǵary oqý ornyn támamdaǵan jas mamandar kompanııaǵa kelip, eki jyl taǵylymdamadan ótip, jumysqa ornalasý múmkindigi bar. Al keıbir mamandar bir jyl, jarty jyl ishinde sheberligin kórsetip, shtatqa ornalasady», deıdi Altynbek Ysqaqov.
Taý-ken metallýrgııa kesheni – ónerkásipti damytýdyń negizi. Táýelsizdik jyldarynda bul sala turaqty ekonomıkalyq ósimge jáne áleýmettik ál-aýqattyń nyǵaıýyna yqpal etti. 2024 jyldyń qorytyndysyna saı el ekonomıkasyna qosqan úlesi 6,9% boldy. Búginde salada 110 myńnan astam adam jumys isteıdi. Olardyń kúndelikti jumysy mashına jasaý, qurylys, munaı-gaz jáne energetıka salasynyń damýyna serpin beredi.
«Metallýrgter merekesinde jumys isteımiz. О́z ishimizde shaǵyn merekelik konsert ótedi. Buryn kásibı merekemizge oraı syıaqy taǵaıyndaıtyn, qazir shyndyǵyn aıtý kerek, syıaqy joq. Biraq kásiporyn birinshi orynda eńbek qaýipsizdigine kóńil bóledi. «Vision Zero» nemese «Nýlevoı travmatızm» degen arnaıy baǵdarlama bar. Qaýipsizdik jumysshylardyń kıiminen bastalady. Bir kıimdi alǵan soń eki-úsh jyl kımeısiń, tozyǵy jetken soń aýystyrýyńa bolady. Jarty jyldan keıin de, ne bolmasa jyrtylyp qalsa, qaıta alasyń. «Ne isteseń de, mynany iste» degen kózqaras joq, aldymen jumys qaýipsiz bolýǵa tıis. Kompanııamyz mettallýrgııa salasynda aldyńǵy qatardaǵy kásiporyn. Osynda jumys istep jatqanyma qýanyshtymyn. Qatardaǵy qarapaıym jumysshydan bastap, basshylyq qyzmetke deıin kóterildim. Eshqandaı tanys-tamyrsyz, aǵa-kókesiz adal eńbekpen osy jetistikke jettik», deıdi ol.
Abaı oblysy
