Sýretterdi túsirgen – Jeńis YSQABAI
Indýstrııalyq aımaqta ornalasqan jańa zaýyttyń ashylý saltanatynda Jetisý oblysy ákiminiń orynbasary Áset Qanaǵatov sóz sóılep, zaýyt ujymyn jáne jınalǵandardy tarıhı sátpen quttyqtady.
«Jetisý oblysy qurylǵannan beri ónerkásiptik óndiristiń kólemi jyl saıyn artyp keledi. Máselen, keıingi úsh jylda bul kórsetkish 16,8%-ǵa ósip, 347 mlrd teńgege jetti. Jalpy, óńirde osy ýaqyt ishinde 85 mlrd teńgege 35 joba júzege asty. Onyń ishinde jel jáne sý elektr stansalary, akkýmýlıator men kún panelderin shyǵaratyn zaýyttar bar. Qurylys qarqyny joǵary Jetisýda osyndaı óndiris oryndarynyń ashylýy – ýaqyt talaby. Sebebi óńirde áleýmettik nysandar men turǵyn úıler jappaı salynyp jatyr. Jańa zaýyt jergilikti qurylys salasyn sapaly, qoljetimdi materıalmen qamtamasyz etip qana qoımaı, sheteldik ónimderge táýeldilikti de azaıtady», dedi oblys ákiminiń orynbasary.
«Stalbeton» JShS-nyń bul bastamasy – el ekonomıkasyn ártaraptandyrý baǵytyndaǵy naqty qadamdardyń biri. Kásiporyn dırektory Qalqabaı Musanov osy mańyzdy iske atsalysqan barlyq mamanǵa alǵys bildirip, ujymdy jańa belesterge shaqyrdy. Onyń aıtýynsha, zaýyttyń iske qosylýy – úlken eńbektiń, júıeli jumystyń, jaýapty kózqarastyń nátıjesi.
«О́ńirde óńdeýshi ónerkásip, aýyl sharýashylyǵy jáne qurylys salalary qarqyndy damyp keledi. Osy baǵyttarda bastalǵan tyń jobalar óńirdiń bolashaqtaǵy ekonomıkalyq tiregine aınalmaq. Jańa óndiris ordasynyń ashylýy tek ekonomıkalyq jańalyq emes, bul – óńir turǵyndary úshin úlken úmit, jas mamandar úshin múmkindik, al Jetisýdyń bolashaǵy úshin jarqyn joldyń bastaýy», deıdi Q.Musanov.
Jańa zaýyt – tek qurylys ındýstrııasyna emes, jalpy oblystyń áleýmettik-ekonomıkalyq damýyna oń serpin beretin bastama. Birinshiden, jergilikti halyqqa jumys orny ashylady. Ekinshiden, aımaqtaǵy qurylys kompanııalary sapaly otandyq ónimge qol jetkizedi. Úshinshiden, óndiris ımportty almastyrý saıasatyna naqty úles qosady. Kásiporynnyń óndiristik dırektory Dáýren Nuraly zaýyttyń jumysy men artyqshylyqtary jóninde aıtyp ótti.
«Bizde shyǵarylatyn avtoklavty qataıtylǵan gazdalǵan beton kirpishter zamanaýı talaptarǵa saı. Olar Qytaı tehnologııasy boıynsha óndiriledi, al jabdyqtar halyqaralyq standarttarǵa jaýap beredi. Jergilikti mamandar arnaıy oqýdan ótip, zamanaýı tehnologııamen jumys isteýge beıimdeldi. Bizdiń ónimniń basty artyqshylyǵy – jylý saqtaý qabiletiniń joǵary bolýy. Qystyń qaqaǵan sýyǵynda – úıdi jyly ustasa, jazdyń aptabynda – salqyndyqty saqtaıdy», dedi Dáýren Nuraly.
Zaýyttyń tegin jataqhanasy bar. Qyzmetkerler kúnine úsh ret ystyq tamaqpen qamtylady. Jumysqa ornalastyrylǵan mamandar arasynda Aqsý aýdanynan kelgen jas otbasy da bar.
«Zaýytqa birinshi bolyp ózim, sodan keıin jubaıym ornalasty. Meniń mamandyǵym tárbıeshi, kúıeýim IT salasynyń mamany. Otasqanymyzǵa 8 jyl boldy, úsh balamyz bar. Zaýytta arnaıy daıyndyqtan óttim, qazir tabysty jumys istep kelemin. Jumys kestesi jas otbasymyz úshin qolaıly, jalaqymyz turaqty», deıdi Mınar Dúısebek.
Jetisý oblysy
