Joba «Bolashaq» túlekteri qaýymdastyǵynyń Almaty bólimshesiniń uıymdastyrýymen ótken. Álemniń úzdik ýnıversıtetterinde bilim alǵan kásibı mamandardyń kómekke kelýi – jergilikti turǵyndar úshin biregeı múmkindik. «Bolashaq» túlekteri qarapaıym halyqtyń densaýlyǵyn jaqsartyp, sapaly medısınalyq kómek berýdi maqsat tutady. Is-sharanyń basy-qasynda júrgen, negizgi uıymdastyrýshy – Mańǵystaý óńirindegi «Bolashaq» qaýymdastyǵynyń resmı ókili Murat Akınov.
Turǵyndarǵa medısınalyq kómek berýge arıtmolog, onkolog-gınekolog, ınfeksıonıst, epıdemıolog, endokrınolog, kardıohırýrg, kardıolog, otorınolarıngolog, mamolog, psıholog, nefrolog, allergolog mamandar, ıaǵnı álemniń úzdik ýnıversıtetterinde bilim alǵan 12 joǵary sanatty medısına mamany qatysqan. Mamandar nebári eki kúnde 170-ten asa naýqastyń dıagnozyn dál anyqtap, emdeý josparyn usyndy. Onyń ishinde kardıolog 35 pasıentti qabyldap, 3 naýqasqa Almaty qalasynda ota jasaý keregin usyndy. LOR dáriger 45 pasıentke, kóbine balalarǵa tıisti em taǵaıyndady. 20 pasıentke ota jasaýdy usyndy. Mammolog maman 25 áıelge kómek berip, 1 pasıentte qaterli isik baryn anyqtap, 3 naýqasty otaǵa jiberdi. Budan ózge baǵyttaǵy mamandar da turǵyndarǵa der kezinde em taǵaıyndap, kómek qolyn sozdy.
Medısınalyq kómekpen qatar kásipkerlik baǵyttaǵy keńes jas mamandar men kásipkerlerdiń damýyna, tabysyn arttyrýǵa zor tájirıbe syılady. 30 jasóspirim men jas kásipkerlik jáne mansaptyq baǵytta keńes aldy.
Joba munymen shektelmeıdi, sonymen qatar óńirdiń damýyna, bilim salasy men áleýmettik jaýapkershilikti arttyrýǵa baǵyttalǵan. Mamandardyń ıgi isi jastardy sapaly bilim alýǵa jáne elge qyzmet etýge shaqyrady. Halyq densaýlyǵyn jaqsartýǵa, bilim berýge jáne kásipkerlikti damytýǵa múmkindik syılaıtyn, ultty súıýdi nasıhattaıtyn baǵdarlama el kóleminde jalǵasa bermek degen nıettemiz.
