Oblys ákimi Nurymbet Saqtaǵanov metallýrgterdi kásibı merekesimen quttyqtap, metallýrgııa salasy óńir ekonomıkasynyń jetekshi baǵyty ekenin atap ótti. Ol osy salada eńbek etip júrgen árbir mamannyń qajyrly eńbegi men tabandylyǵynyń arqasynda óndiris kólemi jyl saıyn ulǵaıyp kele jatqanyn aıtty. Bul óz kezeginde otandyq óndiris salasynyń damýyna úlken serpin berip otyr. Aımaq basshysy búginde myńdaǵan shyǵysqazaqstandyqtyń metallýrgııa salasynda eńbek etip jatqanyn alǵa tartty. Áleýeti zor óndiristik óńirde tústi metallýrgııanyń 60%-y, myryshtyń 100%-y, tazartylǵan kúmistiń 70%-y óndiriledi. О́skemen qalasynda ornalasqan iri kásiporyndar – «Kazsınk» JShS, «ÚMZ» AQ, «О́skemen TMK» AQ jáne «Vostoksvetmet» JShS strategııalyq mańyzy bar, sırek kezdesetin metaldardy óńdeýmen aınalysady.
Qazir oblystaǵy 70-ten astam ónerkásip pen zaýyttyń 80%-y – óńdeýshi kásiporyndar. Máselen, álemde bar bolǵany úsh berılıı shyǵaratyn zaýyt bolsa, al TMD elderi boıynsha tantal óndiretin bes zaýyttyń biri – О́skemendegi Úlbi metallýrgııalyq zaýyty. Atalǵan kásiporyn ýran, tantal jáne berılıı ónimderin iri kólemde óndiredi jáne Qazaqstanda atom elektr stansalary úshin jylyna 200 tonna tómen baıytylǵan ýran otynyn shyǵaratyn jalǵyz zaýyt sanalady.
«Metallýrgııa salasyn «ındýstrııanyń júregi» deýge bolady. Bul rette, el múddesine adal qyzmet etip, qajyrly eńbektiń kósh basynda turǵan, óńirdegi metallýrgııa salasynyń dástúrin qalyptastyryp, berik negizin qalap bergen ardagerlerge alǵys bildiremin. Sizderdiń tabandy eńbekterińizdiń arqasynda bizdiń oblys ónerkásiptik damýdyń jańa satysyna kóterildi. Elimizdiń óndiris salasy da osy eńbektiń nátıjesinde qarqyn alyp keledi. Endi bul dástúrdiń jalǵasyn taýyp kele jatqany qýantady. Bul – sizderdiń kásibılikterińizdiń, eńbekqorlyq pen tózimdilikterińizdiń aıqyn kórinisi. Ár azamattyń ál-aýqatyn jaqsartyp, elimizdiń damýyna súbeli úles qosyp kelesizder. Merekelerińizben quttyqtaımyn!» dedi oblys ákimi.
Merekelik jıynda sala ardagerleri men úzdik mamandarǵa memlekettik marapattar men oblys ákiminiń atynan Alǵys hattar tabystaldy. ShQO Tabıǵı resýrstar jáne tabıǵatty paıdalanýdy retteý basqarmasynyń «Shyǵys sýqoımalary» KMK ınjener-gıdrotehnıgi Mırzan Imanjanov «Qurmet» ordenimen, «Vostoksvetmet» JShS Artemev shahtasynyń jerasty ýchaskesiniń taý-ken sheberi Serikqan Tóleýbaev jáne «Kazsınk» JShS mys zaýytynyń balqytýshysy Kazez Bekshentaev III dárejeli «Eńbek dańqy» ordenimen, «Kazsınk» JShS, Maleev kenishiniń júk tıeý-jetkizý mashınasynyń mashınısi Rýslan Karykbaev «Eren eńbegi úshin» medalimen marapattaldy. Sonymen qatar Ýran óndirisiniń 6-razrıadty apparatshysy («ÚMZ» AQ) Mıhaıl Matrıonınge, Tantal óndirisi №58 sehtyń 6-razrıadty apparatshysy («ÚMZ» AQ) Orazaly Jetenovke, №3 sehtaǵy tıtan men sırek metaldardy qalpyna keltirý jáne aıdaý peshshisi («О́skemen TMK» AQ) Iýrıı Kýlıkovqa, №12 sehtyń balqytýshysy («О́skemen TMK» AQ) Azamat Qojahmetovke, Ertis shahtasynyń óndirý ýchaskesiniń skreperlik lebedka mashınısi («Vostoksvetmet» JShS) Nurlan Esimbekovke, Artemev shahtasynyń tıep-jetkizý kóliginiń mashınısi («Vostoksvetmet» JShS) Arhat Kópjasarovqa oblys ákiminiń Alǵys haty tabystaldy.
Jıyn sońynda aımaq basshysy marapat ıelerin quttyqtap, saltanatty is-sharanyń qatysýshylarymen estelik sýretke tústi.
