Qýanyshty habardy estı sala strıtlıftıngten álemniń jeti dúrkin, qol kúresinen álemniń bes dúrkin, kir tasyn kóterý sportynan álem chempıony, kir sporty men qol kúresinen dúnıejúzilik federasııany uzaq jyl basqarǵan Muqan Aǵzamovpen habarlasqan edik.
– Strıtlıftıng – jyldam qarqynmen ósip kele jatqan sport túri. Qazir álemniń júzge tarta eli osy sport túrimen shuǵyldanady. Bul joly 17 memleketten 560 sańlaq sportshy júldelerdi sarapqa saldy. Eptilik, joǵary sheberlik, sporttyń birneshe túrin toptastyrǵan saıys elimizde de damyp keledi. Bir jyl buryn Úndi eliniń Haıdarabad qalasynda ótken álem chempıonatynan jeti altyn, eki kúmis, bir qola medal alyp, komandalyq esepte úshinshi orynǵa ıe bolǵan edik. Bul joly nebári jeti sańlaq baryp, beseýimiz álem chempıony bolyp oraldyq. Atap aıtar bolsam, baýyrym Erik (osymen tórtinshi ret), nemerem Dinmuhamed 14-16 jastaǵy jasóspirimder arasynda, men ardagerler arasynda, Ivan Malkov pen Vladımır Jaınaqov altynnan alqa taqtyq, – dep málimdedi Muqan Saǵıdollauly.
M.Aǵzamov uzaq jyldan beri Ulan aýdanyna qarasty Aıyrtaý aýylynda turady. Tehnıka ǵylymdarynyń kandıdaty, professor, aýyl sharýashylyǵynyń maıtalman mamany, kezinde onnan astam rasıonalızatorlyq jańalyqtardy óndiriske engizgen, jıyrmadan astam ónertabystyq patenti bar. Muqan Saǵıdollaulynyń shegirtkeni joıýǵa arnalǵan qondyrǵysyn óńirdiń sharýa qojalyqtary keńinen paıdalanǵan. Sársen Amanjolov atyndaǵy Shyǵys Qazaqstan ýnıversıtetinde jas kadrlarǵa óz tájirıbesin úıretip, dáris oqıdy. Uzaq jyl kir sporty men qol kúresinen dúnıejúzilik federasııanyń vıse-prezıdenti, prezıdenti boldy. Álem chempıonattary men Azııa birinshilikterinde kir sporty men qol kúresinen on eki ret júldeger, jeti ret chempıon atandy.
Aǵzamovtar – sportshylar áýleti. О́tken jyly Muqan Saǵıdollaulynyń baýyry Erik Aǵzamovtyń uly Jan strıtlıftıngten Azııa federasııasynyń prezıdenti, uly Júrsin dúnıejúzilik federasııanyń vıse-prezıdenti bolyp saılandy. Eki Olımpıada oıyndaryna qatysqan, qazaq kúresinen túıe balýan Rýslan Seıilhanovtyń esimi sport súıer qaýymǵa jaqsy tanys. Rýslannyń uly Saıat ta bolashaǵynan úmit kútetin jas. Ustaz, professor, jańashyl ǵalym Muqan Aǵzamovtyń bergeninen bereri kóp. Elimizdiń ataq-dańqyn búkil álemge tanytyp júrgen sportshylar áýletiniń shyǵar bıigi áli alda.
Ońdasyn ELÝBAI,
Qazaqstannyń qurmetti sport qyzmetkeri
Shyǵys Qazaqstan oblysy,
Ulan aýdany
