Sýretti túsirgen – Valerıı BÝGAEV
Bólingen qarajattyń negizgi somasyn, ıaǵnı shamamen 3 mlrd teńgeni Ekibastuz qalasynyń jylý jelilerin jańǵyrtý jónindegi eki jobaǵa – ortalyq jylý taratý pýnktinen 1,4 shaqyrym jerdegi eldi mekenge deıingi TM-I, TM-III jylý magıstraldaryn jóndeýge bólý josparlanyp otyr. Al Pavlodar qalasyna Pavlov – Shevchenko – Kataev kósheleri boıyndaǵy shaǵyn aýdandy jylýmen qamtamasyz etýge Qamzın kóshesi jelisindegi TM-13 salý jobasyn aıaqtaýǵa 802 mln teńge baǵyttalady.
Shyǵyndardyń jalpy somasy 5,8 mlrd teńgeni quraıdy. Úkimet rezervinen 3,8 mlrd teńge bólindi. Qalǵan 2 mlrd teńge kólemindegi qarajat oblystyq bıýdjetten qarjylandyryldy.
2024 jyly Úkimet rezervinen bólingen qarajatqa uzyndyǵy 9 shaqyrym magıstraldyq jylýmen jabdyqtaý jelileri jóndelgen. Ekibastuz JEO-da qazandyq agregattary jóndelip, tazartylǵan sý qubyry salyndy. Budan bólek, oblystyń jylý beretin kásiporyndarynda uzyndyǵy 2,4 shaqyrym jylý jelileri jańǵyrtyldy. Onyń ishinde «Tarıfti ınvestısııaǵa aıyrbastaý» baǵdarlamasyna kóshý sheńberinde salynǵan, quny 1,7 mlrd teńge turatyn 2,1 shaqyrymdyq jylý jelisi bar. Júrgizilgen jumys nátıjesinde bıyl jyl basynda jelilerdiń tozýy 79,7%-ǵa deıin tómendedi.
Oblys ortalyǵy men Ekibastuz qalasyndaǵy jelilerdiń tozýyn odan ári tómendetý, aldaǵy jylytý maýsymynda úzdiksiz jylýmen qamtamasyz etý úshin jylý magıstraldarynyń aǵymdaǵy rekonstrýksııasyn ýaqtyly aıaqtaý qajet.
Byltyr jeltoqsanda bekitilgen «Energetıkalyq jáne kommýnaldyq sektorlardy jańǵyrtý» ulttyq jobasyn júzege asyrý sheńberinde Pavlodar qalasyndaǵy 1-NO-52 JEO ýchaskesinde ótkizý qabiletin arttyra otyryp, 9,8 mlrd teńge somaǵa jańa TM-20a jylý magıstralin salý josparlanyp otyr. Joba negizinde respýblıkalyq bıýdjetten qarajat qarastyrylmaǵan qala aýmaǵynyń 30%-yn jylýmen qamtamasyz etý kózdelgen.
«Oblysta jyl saıyn jazǵy kezeńde sýmen jabdyqtaý, sý burý jelileriniń tozýyn azaıtý maqsatynda da jóndeý úzilmedi. Bıyl 26,6 shaqyrym sýmen jabdyqtaý jelisin salý, qaıta qurý jóninde 10 joba qarastyrylyp otyr. Sondaı-aq Ýspen aýdanynyń Travıanka, Nadarovka aýyldarynda 2 keshendi blok-modýl ornatý josparlanǵan. Jalpy, 2025 jyldyń qorytyndysynda joǵaryda atalǵan is-sharalar sýmen jabdyqtaý jelileriniń tozýyn 46,6%-ǵa (qazir 47,1%), sý burýdy 72,3%-ǵa (qazir 72,4%) deıin tómendetýge múmkindik beredi. О́tken jyly Maıqaıyń kentiniń sý qubyrynda apat bolyp, eldi mekenge sý berý qıyndaǵany málim. Uzyndyǵy 20 shaqyrym, dıametri 1000 mm magıstraldyq sý qubyry qaıta jańartyldy. Qazir barlyq qurylys-montaj jumystary aıaqtaldy, sý qubyry shtattyq rejimde jumys istep tur», dedi Pavlodar oblysynyń ákimi Asaıyn Baıhanov.
Pavlodar oblysy
