Foto: Elorda ákimdigi
Jas azamattar saıabaq aýmaǵynda 200-den astam aǵashqa sý quıyp, qorshaǵan ortany jasyl jelekpen kómkerýge atsalysty, qoqys pen aram shópter jınap, 150 kılogramnan asatyn 18 qap qaldyq shyǵardy. Sondaı-aq, 20-dan astam qatysýshy úılerinen arnaıy alyp kelgen plastıkalyq bótelkeler men ydystardy tapsyryp, qaıta óńdeýge jiberdi.
«Búgingi sharanyń maqsaty – jastardyń boıynda tabıǵatqa janashyrlyqty qalyptastyrý, olardy qorshaǵan ortaǵa jaýapkershilikpen qaraýǵa úıretý. Jasyl orta – jarqyn bolashaqtyń kepili. Bul tek senbilik emes, úlken tárbıe mektebi», deıdi joba jetekshisiniń orynbasary Abdýrashıtov Asylbek.
Sonymen qosa, «Kitap almasý» aksııasy da ótip, 30-dan astam jas oqyp shyqqan kitaptaryn jańa kitaptarǵa almastyryp, rýhanı baılyqqa degen qushtarlyqtaryn tanytty.
«Jasyl el» baǵdarlamasy jyl saıyn myńdaǵan jasty biriktirip, eldi mekender men saıabaqtardy abattandyrýǵa, ormandy alqaptardy qalpyna keltirýge úles qosyp keledi. Bul – jastardyń eńbek pen eljandylyqqa jáne birlikke bastar joly. Jastar saıabaǵyndaǵy búgingi shara sonyń bir aıǵaǵy ispetti.
