Foto: Ashyq derekkózden
Qylmystyq qýdalaý organy Perızat Qaırat pen onyń anasyn aldyn ala sóz baılasý arqyly top bolyp, birneshe ret asa iri kólemde jasalǵan alaıaqtyqtyń úsh epızody (QK 190-baby 4-bóliginiń 2-tarmaǵy), sondaı-aq qylmystyq jolmen alynǵan kiristerdi zańdastyrý (QK 218-baby 2-bóliginiń 1-tarmaǵy jáne 3-bóliginiń 3-tarmaǵy) boıynsha aıyptaǵan.
Sot prosesinde usynylǵan barlyq dáleldemeler jan-jaqty zerttelgen.
Sottalýshy Perızat Qaırattyń ótinishi boıynsha keıbir dáleldemeleri jáne onyń ishinde jaýaptary jabyq sot otyrysynda qaraldy.
Sotta 2021 jylǵy 4 qazanda Perızat Qaırat jalǵan quryltaı qujattaryn jasap, ataýy zańdy túrde jumys isteıtin «Biz Birgemiz Qazaqstan» qoryna uqsas «Biz Birgemiz Qazaqstan 2030» qoǵamdyq birlestigin tirkegeni anyqtaldy.
Perızat Qaırat anasymen birge aldyn ala sóz baılasý arqyly áreket etip, azamattardy muqtaj jandarǵa, sonyń ishinde sý tasqynynan zardap shekkender men Palestına halqyna kómek kórsetý maqsatynda qarajat jınaýǵa shaqyrǵan.
Osylaısha, 2021 jylǵy qarashadan 2023 jylǵy qazanǵa deıin aıyptalyshylar ońaltý ortalyǵyn salý, múgedek balalarǵa kómek kórsetý jáne qoǵamdyq is-sharalardy uıymdastyrý syltaýymen 126,7 mln teńgeni alaıaqtyq jolmen jınap, ıelengen.
2023 jylǵy qarashadan 2024 jylǵy sáýirge deıin Palestına halqyna kómek kórsetý syltaýymen 559,1 mln teńgeni zańsyz ıelengen.
2024 jylǵy 1 sáýiri men qarasha aralyǵynda Qazaqstanda tótenshe jaǵdaı rejımi engizilgen kezde sý tasqynynan zardap shekkenderge kómek kórsetý syltaýymen 2,8 mlrd teńge kóleminde qarajat jınap, ıemdengen.
Jalpy keltirilgen shyǵyn kólemi 3,5 mlrd teńgeni quraǵan.
Jınalǵan qarajattar «Biz Birgemiz Qazaqstan 2030» qoǵamdyq birlestiginiń shotyna túsken soń, Perızat Qaırat olardy ózi men anasynyń jeke shottaryna aýdarǵan.
Olar qylmystyq jolmen alynǵan kiristerdi gúl bıznesin satyp alý jáne jalǵan mámileler jasaý arqyly zańdastyrǵan.
Sonymen qatar, aıyptalýshylar urlanǵan aqshany qymbat jyljymaıtyn múlik, avtokólikter, áshekeıler, kıim-keshek, jıhaz satyp alýǵa, demalystar men jóndeý jumystarynyń aqysyn tóleýge jumsaǵan.
Sot tergeýiniń nátıjesinde Perızat Qaırat pen Ǵaını Alashbaeva ózderine taǵylǵan aıyptar boıynsha kináli dep tanyldy.
Astana qalasynyń qylmystyq ister jónindegi aýdanaralyq sotynyń málimetinshe, olardyń kinálary jábirlenýshiler men kýálardyń jaýaptarymen, saraptama qorytyndylarymen, zattaı dáleldemelermen jáne qylmystyq is materıaldarymen tolyq dáleldengen.
Memlekettik aıyptaýshy Perızat Qaıratqa 10 jyl bas bostandyǵynan aıyrý jazasyn, anasyna 8 jyl bas bostandyǵynan aıyrý túrinde jazany taǵaıyndaýdy suraǵan bolatyn.
Sottalýshylar kinálaryn moıyndamaı, ózderin aqtaýdy suraǵan.
Sot QK 190-babynyń 4-bóligi men 218-babynyń 3-bóliginiń sanksııasy 5 jyldan 10 jylǵa deıin bas bostandyǵynan aıyrý jazasyn kózdeıdi jáne aýyr qylmystar sanatyna jatady.
Sot bul qylmystardyń erekshe arsyzdyqpen jasalǵanyn atap ótti.
Olar qazaqstandyq qoǵamnyń tózimdilik pen muqtaj jandarǵa janashyrlyq sııaqty irgeli qundylyqtaryna nuqsan keltirip, azamattarda qaıyrymdy isterdiń qajettiligine degen kúmán týdyrǵan.
Jaza men jaýaptylyqty aýyrlatatyn jaǵdaı retinde qylmystyq quqyq buzýshylyqtardyń tótenshe jaǵdaı kezinde jasalýy aıtyldy.
Al jazany jeńildetetin mán-jaılar anyqtalǵan joq. Jábirlenýshilerge keltirilgen materıaldyq shyǵyn ótelmegen.
Osyny eskere otyryp, sot Perızat Qaıratqa 10 jyl bas bostandyǵynan aıyrý jazasyn, Ǵaını Alashbaevaǵa 7 jyl bas bostandyǵynan aıyrý (onyń qart jasyn eskere otyryp) jazasyn taǵaıyndaýdy ádiletti dep sanady.
Sot úkimimen aıyptalýshylar 10 jyl merzimge qaıyrymdylyq qarajattaryn jınaýmen baılanysty qyzmetpen aınalysý quqyǵynan aıyryldy (zańda kózdelgen eń uzaq merzim).
Sot «Vela Village» kottedj qalashyǵyndaǵy jeke úı, «Akbulak Riviera», «Sensata Plaza», «Highvill Ishim Gold», «Kók Jaılaý» turǵyn úı keshenderindegi páterler men turaq oryndary, «Mercedes-Benz S450» 2024 j., «Lexus LX 600» 2024 j. syndy múlikterin urlanǵan qarajatqa satyp alynǵanyn atady.
