Nysandy iske qosý rásimine Premer-mınıstrdiń orynbasary Ermek Kósherbaev, Qostanaı oblysynyń ákimi Qumar Aqsaqalov, «Kedentransservıs» AQ Bas dırektory Elnar Jumataev jáne «Allur» kompanııalary dırektorlar keńesiniń tóraǵasy Andreı Lavrentev qatysty. Atalǵan jobany «О́nerkásipti damytý qorynyń» qoldaýymen «Kedentransservıs» AQ júzege asyrady. Jalpy quny 64 mlrd teńge bolatyn logıstıkalyq keshen Qostanaı irgesindegi 133,6 gektar aýmaqty alyp jatyr. «Tobyl» KLK iske qosylǵan soń jylyna kólemi jıyrma fýttyq 400 myń konteıner nemese 11 mln tonnadan astam júk tasymaldanbaq.
Keshen 500-den astam logısterdi, operatorlardy, IT jáne qyzmet kórsetýshi mamandardy jumyspen qamtamasyz etedi. Premer-mınıstrdiń orynbasary Ermek Kósherbaev iske qosý rásiminde sóılegen sózinde jobanyń mańyzyna toqtaldy.
«Biz jaı ǵana logıstıkalyq hab salyp jatqan joqpyz, eldiń jańa ekonomıkalyq geografııasynyń berik negizin qalap jatyrmyz. «Tobyl» keleshekte logıstıka, sıfrlandyrý, bilim jáne ındýstrııa toǵysqan zııatkerlik alańǵa aınalady. Munda jastarǵa kóptegen jańa mamandyq, jańa jumys oryndary qurylmaq. Bul – aımaqtyq emes, ulttyq joba, búkil eldiń órkendeýiniń katalızatory. Keshen elimizdiń jahandyq jetkizý tizbegindegi pozısııasyn nyǵaıtyp, bıznes pen ınvestorlar úshin jáne osynda, óz otanynda ósip, damyǵysy keletin adamdar úshin jańa múmkindik ashady», dedi Premer-mınıstrdiń orynbasary.
2025 jyldyń birinshi jartyjyldyǵynda el arqyly tranzıttik tasymaldaý 16,8 mln tonnany quraǵan. Bul ótken jyldyń osy kezeńimen salystyrǵanda 4%-ǵa artyq. Mamandar «Tobyl» KLK iske qosylǵan soń kórsetkish edáýir ulǵaıady dep otyr.
«Jańa keshen kásiporyndar úshin logıstıkalyq shyǵyndardy tómendetýge, eksportqa baǵdarlanǵan óndiristerdi damytýǵa jáne óńdeý sektoryna jańa ınvestısııalar tartýǵa jáne jańa ónerkásiptik kásiporyndardyń paıda bolýyna jaǵdaı jasaıdy. Biz «Tobyl» kólik-logıstıkalyq kesheni ınvestısııa áleýetin arttyryp, óńir ónerkásibiniń odan ári damýyna serpin beretinine senemiz», deıdi «Tobyl» kólik-logıstıkalyq kesheniniń dırektory Aıdyn Álimov.
Keshen Qytaı, Ortalyq Azııa, Túrkııa, Iran, Aýǵanstan jáne Eýropany baılanystyratyn halyqaralyq kólik dálizderine tikeleı qosylady. Qazaqstannyń soltústiginen Reseıdiń Oral aımaǵyna, Qytaıǵa jóneltiletin júk kólemi de artady. Keshen aýmaǵynda «Bári bir jerde» qaǵıdaty boıynsha termınaldar, qoımalar, kedendik rásimdeý, IT jáne servıstik aımaqtar ornalasady. Júkterdi baqylaýdyń sıfrlyq júıesi de qamtamasyz etilgen. Qurylys 2027 jyly aıaqtalady dep josparlanyp otyr.
Búginde Qostanaı oblysy – elimizdiń iri ındýstrııalyq ortalyqtarynyń biri. Munyń syrtynda, bıyl óńirde jylyna 70 myń avtokólik shyǵaratyn «KIA» zaýyty, 220 myńnan astam avtokomponent óndiretin jańa kásiporyn iske qosylmaq. Al logıstıka damymaı, mundaı iri kásiporyndardyń ómirsheń bolýy múmkin emes. Demek, «Tobyl» kólik-logıstıkalyq kesheni aımaqta óndiriletin ónimderdiń turaqty eksportyn qamtamasyz etetin birden-bir ınfraqurylymdyq tirek bolmaq.
Qostanaı oblysy
