Qalalyq polısııa departamentiniń Jergilikti polısııa qyzmeti basqarmasy bastyǵynyń orynbasary Aıtan Eleýsizovtiń aıtýynsha, is-sharanyń basty maqsaty kámeletke tolmaǵandar arasyndaǵy quqyqbuzýshylyqtyń aldyn alyp, túngi ýaqytta baqylaýsyz júrgen balalardy anyqtaý, sondaı-aq Qazaqstan Respýblıkasynyń «Bala quqyqtary týraly» zańyn buzǵandardy jaýapqa tartý.
О́ńirlik kommýnıkasııalar qyzmetinde ótken baspasóz máslıhaty barysynda Almatyda ıývenaldy polısııa ınspektorlary men ýchaskelik polıseılerden turatyn arnaýly toptar qurylyp, alǵashqy kúnniń ózinde birqatar zań buzýshylyqtyń oryn alǵandyǵy aıtyldy.
Kámeletke tolmaǵan 137 balanyń saǵat 23:00-den keıin kóshede ata-anasyz júrgeni anyqtaldy. Ata-analary Qazaqstan Respýblıkasy ÁQBtK-niń 442-babynyń 2-bóligi boıynsha ákimshilik jaýapkershilikke tartyldy. 163 jasóspirim mán-jaıdy anyqtaý úshin polısııa basqarmasyna jetkizilip, 10 jasóspirim profılaktıkalyq esepke qoıylǵan. Kámeletke tolmaǵandar arasynda ishimdik ishken 9 fakt tirkelip, 6 oıyn-saýyq mekemesiniń túnde balalardy kirgizip, zań buzǵany anyqtalyp otyr.
Quqyq buzýshylyq faktilerine sáıkes ata-analary ákimshilik jaýapkershilikke tartylyp, jasóspirimdermen áńgimelesken quqyq qorǵaý organdarynyń mamandary zań buzǵan oıyn-saýyq oryndarynyń da tirkeýge alynǵandyǵyn jetkizdi.
Úsh kúngi shara aıasynda túngi reıdpen qatar, oqý oryndarynda, jastar ortalyqtary men áleýmettik jelilerde túsindirý jumystary júrgizile bastady. Onda balalar men ata-analarǵa is-sharanyń maqsatyn aıtyp, zań buzǵan jaǵdaıda jaýapqa tartylatyny týraly aqparat beriledi.
Aıtan Eleýsizov atap ótkendeı, «Túngi qaladaǵy balalar» - bul bir rettik aksııa emes, balalardyń quqyǵyn qorǵap, qaraýsyz qalýdyń aldyn alyp, úı-ishindegi qolaısyzdyqtyń, jasóspirimder arasyndaǵy qylmystyń aldyn alý boıynsha jasalyp jatqan júıeli jumystyń bir bóligi. Ásirese jazǵy demalys kezinde mundaı reıdti úzbeı ótkizgen mańyzdy.
Almaty
