Jalpy zań boıynsha kámeletke tolmaǵan balalarǵa túngi saǵat 22:00-den keıin kompıýterlik klýbtarda, oıyn-saýyq oryndarynda jáne 23:00-den keıin kóshede ata-anasyz júrýge tyıym salynǵan. Osyny negizge ala tártip saqshylary respýblıka kóleminde «Túngi qaladaǵy balalar» atty is-sharany jıi uıymdastyrady. Mundaǵy maqsat – jasóspirimder arasyndaǵy quqyqbuzýshylyq pen olarǵa qatysty qylmystyń aldyn alý.
Keshendi is-shara aıasynda elordalyq polıseıler 27-29 shilde aralyǵynda oıyn-saýyq oryndary, saýda ortalyqtary men kóshelerdi aralap, problemalyq mekenjaılardy tekserdi. Nátıjesinde túngi ýaqytta zańdy ókilderiniń qadaǵalaýynsyz úılerinen tys jerde júrgen jasóspirimderdiń ata-analaryna ákimshilik shara qoldanyldy. Sondaı-aq turmysy nashar eki otbasy anyqtalyp, profılaktıkalyq esepke alynypty.
Onyń biri – Baıqońyr aýdany aýmaǵynda ornalasqan jataqhananyń birinde bólme jaldap turatyn azamat N.A.. Ol osy ýaqytqa deıin ishimdikke salynyp, óziniń kámeletke tolmaǵan bes balasynyń tárbıesimen tolyqqandy aınalyspaǵan. Polıseıler jasóspirimderdi Astana qalalyq «Arnaýly áleýmettik qyzmetterge muqtaj balalardy qoldaý ortalyǵy» kommýnaldyq memlekettik mekemesine ornalastyrǵan. Ári qaraı otbasy týraly materıaldy Baıqońyr aýdany ákimdigi janyndaǵy kámeletke tolmaǵandar isteri jáne olardyń quqyqtaryn qorǵaý jónindegi komıssııanyń kelesi otyrysyna qaraýǵa ázirleýde.
Sonymen qatar ıývenaldyq polısııa bólimi eki jasóspirimdi jeke profılaktıkalyq jumys júrgizý maqsatynda óz baqylaýyna alǵan.
